Angh P.B Acharya-i Paiwang Konyak nem tenüngsang agütsür; Nagaland-i Computer Society of India nungi sempet angu

Dimapur, March 1 (TYO) : Nagaland nung IT aser e-Governance mapa tajung ajiteta Computer Society of India (CSI) -Nihilent-i sempet agütsüba atema Transport & CA & IT & C Minister, Paiwang Konyak nem tenüngsang agütsür, ta Nagaland Angh, P.B. Acharya-i sangdong ka nung metetdaktsü.
Minister Paiwang lenisüba kübok Information Technology & Communication Department, Nagaland-i iba konang bener arutsüba atema ajak nem tenüngsang agütsür, ta Angh-isa ashi.
Kümshia CSI- Nihilent e-Governance Awards ya e- Governance nung mapa tajungba inyakba atema ajiteta agütsür, ta yashi tenüngsang agütsüba sentong ka alidang Commissioner & Secretary, IT & C, K.D Vizo-i iba osang metetdaktsü.
Iba sempet ya State category aser Project category telemsa nung agütsür ta paisa shisem.
India nung State Portal and State Services Delivery Gateway (SP&SSDG) core infrastructure project mezüng inyakbaji Nagaland liasü aser India nung State IT Department-i private Data Centre Operator (DCO) medeni State Data Centre ketdangsüa reprangba state jia Nagaland dang lir. Item atema sempetji angur, ta Commissioner & Secretary-isa shisem.
Computer Society of India-i agütsüba sempetji India nung NGO-i agütsüba sempettem rongnung tematiba lir, ta paisa ashi.
Sentong nung Chief Minister, Dr. Shürhozelie Lezietsu-i Minister, Commissioner & Secretary, IT Department Office aser Staff nem tenüngsang agüja jembidang, department-i mapang tatsüka tsüngda state nem konang bener arutsüogo aser foreign company tem atsür aruogo, ta ashi.
Technology ainba den Naga nunger lanurtemia timtem melii anidaktettsü aser tarutsü nung Nagaland ya Information & Technology nung tajungba state ka akümtsü imlar, ta paisa shisem.
Iba ya Department atema dang masü Nagaland atema kanga dang tongtipang anogo ka lir. Department nung nübo peria meliaka, officer aser staff temi linük jenjang tashi nung ajitettsüsa mapa tajung inyakba atema tenüngsang agütsür, ta IT&C Minister, Paiwang Konyak-ia ashi.
Nagaland Chief Secretary, Pankaj Kumar, IAS-ia ashiba agi, Department-i alizüng aika tongteta mapa inyaker aser linük nung “Ease of Doing Business” junga inyakba nunga Nagaland dena lir.
North East nungi state nungi iba sempet agizüker mezüngbuba state ji Nagaland lir ta Chief Secretary-isa shisem.