Angh dang Ruzazho nem “National Heritage Village” jaloktsütsü mepishir

Dimapur, March 1 (TYO) : Phek district kübok Ruzazho nem “National Heritage Village” jalokjang ta Netaji Subhash Chandra Bose Memorial Development Society (NSCBDS) Nagaland-i Angh P.B. Acharya dang mepishia metetdaktsüogo.
March 1, 2017 nü NSCBDS, Nagaland Chairman, Dr. Er. Vekho Swuro-i anir teshimtet telok kati Raj Bhavan nung Angh den ajurutep, ta PRO to Governor sangdong ka nung metetdaktsü.
Iba mapang Angh-i Naga nungertem aser Subhash Chandra Bose nem tetushi agütsüba nüngshilung yanglutsüla ta ashi.
India nüjiso atema raraba mapang Subhash Chandra Bose-i iba yimtsüng tonga aru aser yimdaklirtemi chiyungtsütem agütsü aser tesem balala nung INA pur meiner senzü. Anungji, Centre-i iba yimtsüng nem Heritage Village jaloktsütsüla. Maneni INA kübok raraba Naga nungertemji nüjiso atema rarartem ta züngsemtsüla aser parnok nem senotsü teyari agütsütsüla, ta tanü Angh-isa metetdaktsü.
Angh-i minister Javadekar den ajuruteptsü aser INA kübok Naga nunger nüjiso atema rarartem indang onük lemsateptsü, nangzük. Paisa tanü tashi taküm alirtem aser India nüjiso atema raradang taküm bendanga agütsüba chinurtem nem tetushi agütsütsü ta nangzük.
“Ni arishi küm 97 tain Poswuyi Swuro nem tetushi agütsür. Netaji-i semdangba mapang pai Dobashi ka ama yaritep” ta PB Acharya-isa ashi.
Küm pungu tejaklen Centre sorkari Netaji-i tatemsabuba semdangba Tsiesezou yimtsüng nem senotsü teyari agütsü aser iba senji shitak amshitsü atema pai mapa inyaktsü, ta Angh-isa shisem.
Tanü Er. Vekho-i, “Netaji-i British nunger yimsüsüba nungi nüjiso anguba sülen yimdaklirtem dang tashi, mapa aser terenlok indang temeten agütsütsü ta nangzük. Anungji, Ruzazho ya ‘National Heritage’ village ka ta tenüng jaloktsütsüla” ta ashi.
Er. Vekho den NSCBDS Secretary, Dupoyi Nyekha aser NSCBDS Phek District Advisor, Kuvehu Soho nungertemi tanü Angh P.B Acharya den ajurutep.