Bangladesh:Khatepdang Islamist telungpur khaset

Dhaka, March 2 (Agencies) : Bangladesh nung police temi mita aoba mapang shibangtsür aliba JMB telungpur züngsem ka police ket nungi jena yoktsü asoshi par teloki police den khatepdang khaset, ta police sangdong ka ajanga metetdaktsü.
Tan khasetsang, arishi küm 23 tain, Aminur Islam (Alam) ya police ana dak kotari agi atsüngba atema pur liasü. Pa ya anüdoklentip tsütsü Jamaatul Mujahideen Bangladesh’s (JMB) military wing nung commander liasü.
Sherpur upazila kübok Jamnagar yimtak JMB telungpur senden ka mendar ta osang tejangja angashiba sülen police temi mita aodang khatepba mapang pa yangji khaset
“Onoki pa ya Mongulbarnü Rajshahi nungi pua yagi anir aru. Brihostibar anepdang 3:00 ako meta Jamnagar yimtak pa den külemi inyakertemi pa onok kabu nungi jena odaktsütsü asoshi injang akhatsü tenzük,” ta police ketdangser tejen, Khan Mohammad Irfaan-i osangbenertem dang ashi.
Item telungpurtemi injang akhaba ajanga police-ia telangzüba agüja injang akhatsü tenzük. Iba mapang Alam khaset saka tangartemjibo jena ao, ta pai ashi.
Iba tesem nungi Police-i injang round asem, aser magazine ana nguteta lir.
2015 küm Bangladesh nung arishi küm 66 tain, Japan nunger aluyimer ka tepsetba case dak sendakba nung Mongulbarnü JMB Islamist telungpur pungu (5) alenseta südaktsütsü obendang agütsüogo.
July 1, 2016 nü Dhaka nung kiralongrartemi India nunger dena nisung 22 tashi taküm samatsüba sülen nungi linük nung telungpur bushia samatsütsü asoshi inyakyim tenzüka lir.