Pakistan:Tamanger tetsür ka tashiyim agi raksatsü, Islam amangdaktsü

Islamabad, March 02 (Agencies) : Pakistan nung tamanger tetsür ka la mapa inyakba kiburi tashiyim agi raksatsü, kibong aküm aser Islam amanger kümdaktsü.
Tanur asem tetsü, arishi küm 31 tain, amitsür Fouzia Sadiq ya lar kibong mesütsü asoshi tangar ki merük mejutsüa jaja.
Lai ashiba agi, lai mapa inyaktsür, Muhammed Nazir Amjad-i mezüng la den tanülatsü o jembia tenzük.
Ajisüaka kodang lai item tatalokba lar jalatem dang oa ashi la dak azük aser kidang nung meindok. Anogo ishika lir külen la ano Amjad’er kidangisa mapa inyaki aodang pai la den tashiyim agi shi nung medem, Islam amanger kümdaktsü aser la den kibonga aküm.
Iba otsü ya 2015 küm atalokba lir.
Amjad talenba kübok alidang ajangshibatem rasaa ashidang, Fouzia-i, “Tsüngremi ni toktsüogo ta bilema ni tasüang sünüa bilem. Ni sarasademtsü anen kechiba süra ni kü sasa ni aibelenogo ta bilema Tsüngremi ni sembar amai bilem. Kü sasa ni kanga memerük amai bilem aser Amjad-i ni maksütsü mapa kija inyak. Saka ni pa menokdangtet aser iba jagi ni kanga jashi. Tsüngremi kü dak tai tonglokja alitsü akok ta ni bilem,” ta ashi.
Ni asütsü asoshi mozü kar achi aser ni mozü kidangi anir ao. Iba maongka agia Amjad-i kü nu menden intoktsü, ta lai ashi.
British Pakistani Christian Association (BPCA)-i la nem phone number ka agütsü aser khenpika lir la Amjad dang nungi jentet.
Lai Islam amangsang den kibong akümbaji balaner, ajisüaka lai iba case makoktsü amai lir anungji, BPCA-i tang ya la yaritsü asoshi professional solicitor ka aaja la atema tenla bendendar aser la jenokdaktsütsü asoshi anüdoklen linük nem temepishiba ka agütsüogo.