India nunger 7 Truman Scholarship atema tenüng benokogo

Washington, March 2 (Agencies) : India nunger, US lisopur tenet taküm küm atema kanga dang akhümket, Harry S. Truman Scholarship atema tenüng benoka lir. Iba scholarship ya college nung tanubupur nem parnoki küm shia pei lesson nung takok tajung angurba, lenisüba sempet aser lokti tenzüktetba sempet dak ajemdaker agütsür.
Parnok den Harry S. Truman telok nung tasadanger teleni March 3 nungi April 7, 2017 tashi interview agitsü aser tatembang nung takok angurtem April 21, 2017 nü metetdaktsütsü, ta Brihostibarnü osang ajanga metetdaktsü.
Iba telen yagi institution 315 nungi shisashir nisung 768 tashi asadangba nung institution 136 nungi nisung 199 tenüng benok.
Iba scholarship asoshi tenüng benoka aliba India nunger, US lisopurtemji University of Georgia nung Shreya Ganeshan, Massachusetts Institute of Technology nungi Anjali Misra, Harvard University nungi Samarth Gupta, Georgetown University nungi Megan Patel, Duke University nungi Maya Durvasula, University of Oregon nungi Manju Bangalore, aser University of Pittsburgh nungi Anjana Murali nunger lir.
Iba schorship kübok sen timtibaji sen dollar 30,000 lir aser ibaji graduate asütsü pur nem agütsür.
Iba scholarship ya Tir 33buba Harry S. Truman nüngtem nung US Congress-i 1975 küm lapoktsüba lir.
Iba scholarship tenzükba sülen par telok yagi shisashir nisung 3,000 tashi nem iba schorship agütsüogo aser ibaji ajanga linük rangben aser alima nung teinyaktetba balaka sayur, ta osang ajangsa ashi.