Moonlight Director Barry Jenkins-i temeyoktep adokba jangratema bilem

Los Angeles, March 2 (Agencies): 89 buba Academy Awards nung Director Barry Jenkins indang film Moonlight-i film tajungtiba award ngua liasü, saka sempet agütsüba mapang nung meyokteper tang film ka nem sempet agütsüba mapangji kanga dang tebenja saka jangratemtsüka liasü ta pai ashi.
Taküm Oscars award agütsüba mapang, film tajungtiba sempet Warren Beatty aser Faye Dunaway nati aibelena La La Land film nem agütsüa liasü.
Osang benertem den sensaksemba mapang Jenkins-i yamai ashi. “Iba mapangto kanga dang tebenja saka jangratemtsü mapangka liasü. Nisung lokti ana mapang tatsüka asoshi külem longjema liasü. Noksa ka nungbo ni aser La La Land producer, Jordan Horowitz küna azüteper aliba angutsü, aser ano kasa mapang Moonlight producer Adele Romanski-i la teka pa tapubang nung yur aliba angutsü. Iba mapangji kanga dang jangratemtsüka liasü.”
Jenkins-i ashiba agi, Moonlight-i Oscar nguli Horowitz shibai iba osang sangdong, pa dak azüittsü asoshi pa molung dangi mezüng aru. “Iba mapang asoshi o jembitsü atema ni renemer liasü, saka item ajak kü molung nungi oadok. Ni iba mapang asoshi kodanga pungmanga maliasü, aser iba pungmang atangjila nung matalok ta bilema liasü, saka onoki akokba osang angashili Jordan dak takok tashi teküratiba nung tua azüitsü asoshi kü molung dangi aru,” ta pai ashi.
Film yanglur Damien Chazelle, shibai best director trophy angu, pai ashiba agi, mezüngbo iba tatalokbato asayamenüba maparen ka ta bilema liasü, saka film anaprongla nung shilem agir sabang nung külemi tua longjemba mapangji pa asoshia jangratemtsüka liasü, ta ashi.