Dr. Jitendra Singh-i Northeast benjungmong Jesus & Mary College nung lapoktsü

New Delhi, March 02 : MoS for Development of North Eastern Region (I/C), Prime Minister’s Office, Personnel, Public Grievances & Pensions, Atomic Energy and Space, Dr. Jitendra Singh-i Brehostibarnü New Delhi nung mezüngbuba North East India Inter College benjung amongdang  certificates agütsüba noksa nung angur.

New Delhi, March 02 (Agencies): Jesus & Mary College nung tanü Northeast benjongmong ayongba sentong, Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy & Space, Dr. Jitendra Singh-i lapoktsüogo.
Iba sentong nung Dr. Jitendra Singh-i College nung lanur takok angurtem nem award agütsü. Sentong nung northeast tesem 8 nungi sobaliba ken tsüngkang amala sentong balala sayaa liasü. Kaketshirtemi stall balala ajanga northeast nunger chiyongtsü balala sayaa ayok. Iba sentong nung Jesus & Mary College Principal Sister (Dr.) Rosily, Sister (Dr.) Molly, college nung mapa inyakertem aser kaketshirtem aika arua aden.
Iba sentong nung jembidang Dr. Jitendra Singh-i Jesus & Mary College puri mezüngser ania iba amala sentong ayonga amongba atema tenüngsang agutsü. Linük nung tongtibang college ka ama tanü amala sentong ayonga amongba ajanga tanga institution temia Northeast purtem atema mejeta amongba sentong ayonga amongtsü asoshi ajungmesotsü. Iba sentong ya kanga tongtibang kechiyong Delhi nung aliba tongtibang college aser university department balala nung northeast nungi nütsüng aika aliba dang masü saka parnoki parnok aliba metetdakja, kaketshisatsü bushiba nung dang masü saka asaya balala nunga takok temaba jenjang nung nguteter, ta pai ashi.
Dr. Jitendra Singh-i maneni ashiba agi, northeast nung aliba nübortem indang sempet, yimyayimbong aser inyakyim tajung balala metetdaktsüba ajanga iba tesem nung alirtem dak alaka India tesem balala nung parnok tali meteta akümtsü, koba alimai memeteti ali. Pai iba onük nung jembidang ‘literacy rate’ nung Kerala sülen Mizoram aliba tetshia jembi, koba state kümer küm 30buba dang lir. Maneni saisapong nung Manipur aser Tripura tsürtem sempet aser asaya yimyatem tanga terenlokdak state tem ajungmesotsü asoshi tatishitsü tajung lir, ta paisa ashi.
Iba sentong nung department balala nungi tesayurtem aser kaketshirtem den onük balala nung Dr. Jitendra Singh den sensaksem aka.