Aluyimbaji industry tetenzükdak

Kohima, March 2 (TYO) : Nagaland nung industry renloktsü asoshi mezüng tenyatsüji aluyima, alu nungi adokbatem shishilemba dak peria yoktetbaji asütsü.
“State nung aluyimba ji pasasa organic lir anungji ibaji ajanga organic chiyungtsü shishilembatsü lenmang sadema lapoker,” ta Nagaland Vision 2030 nung keta aliba document nung shia lir.
State nungi jang aser ibala mesükba chiyungtsütem, süngjanglijang, süngolemba aser tashitara chiyungtsütem agi pongdang nung asepba (canned) chiyungtsü yanglua yoktettsüsa lir, ta iba osang ajangsa ashi.
Ano agro industry atema rubber, süngo aser coffee densema lir.
State nung mozü yanglutetba süngdong tilatem tapu 650 jangjateta lir. Anungji Sikkim mesüka state nunga mozü yangluba industry amenoktettsü, ta kasa osang ajanga ashi.
2015 küm state nung ninang mochitzü 400 MT adok aser ibaji 2030 tashi nungbo 5000 MT tashi adoktsüsa inyaktettsü. Ibaji ajanga ninang mochitzü industry nung terelok bener arutettsü.
Ano Dimapur nungbo kol peria aliba süoshi yangluba telen asem tashi lir. Technology tasen ajanga designs/materials tasen yangluteter anungji item telen ajanga shishilemba ajungkettsür, ta Nagaland Vision 2030 osang ajanga ashi.