Chotizuh Sazo-i PHE Minister office mapa tenzükogo PHE

Kohima, March 02 (TYO): 12buba Nagaland Legislative Assembly nung taoba Speaker, Chotizuh Sazo PHE Minister shimba sülen March ita mezüngnü office mapa agizükogo.
Pa den pa kinüngtsü, nija staff tem aser par constituency party nung inyakertem liasü.
PHE Secretary Dr. Maongwati Aier IAS aser PHR Joint Secretary, Akumla NCS nati Minister meiner official chamber-i aoba sülen Chakhesang Baptist Church, Kohima Pastor, Rev. Dr. Kevekhalo-i Tsüngrem temoatsü meshija sarasademtsü.
Sentong nung Secretary-i Minister dang, tzü agi okrongba mapang Kohima-i tzü abentsü atema tawa PHE department aser Kigwema yim na tsüngda tezüngzktep ka agiogo, ta metetdaktsü.
Secretary-isa, Konoma aser Poilwa yim den jembia tezüngzüktep agiba sülen Kohima-i tzü peria bener arutsü atema PHE department-i achaayanga inyaktsü, ta metetdaktsü.
Minister dang pa atema tongtibangba mapaji kechi asütsü ta asüngdangba langzüdang Ministeri, pa tejangrabaji merükmejua alitsü sanitation aser sustainable environment atema Civil Secretariat Complex nem tzü peira agütsüner, ta ashi.
Paisa, “Secretariat merükmejua alitsüji kanga tongtibang, kechiyong Secretariat semdangertemji state nungi dang masü saka tanga state tem mesüra bendanglen nungi official nüngdak balala atema arur, aser asen state yimtiba, Kohima atema Civil Secretariat ya nümadangtsü ka lir,” ta ashi.
Minister-isa, PHED office ya digitalise süa shidikaket mamshiba office ka kümner ta lemsatep.