Aluyimertem soseta asüba anema sorkari shitak meinyaker: SC

New Delhi, March 03 (Agencies): Linük nung aluyimertem sentsüh aser aonsotsü junga mezüsentetba ajanga aluyimertem soseta asüba atema tebilemtsü akar, ta shia Supreme Court (SC)-i, iba tebilemtsü koktettsü atema sorkar lenmang tai nung jajar ama reprangteter, ta metetdaktsü.
Gujarat nung aluyimertem jenti soseta asüba atema melungtet telok, ‘Citizens Resource and Action & Initiative’-i benokba onük ka angadangba mapang bench-i item ya metetdaktsü.
Aluyimertem soseta asüba tebilemtsü onük atema sorkar sentong kechisa ali ibaji metetdakjang, ta shia Chief Justice J S Khehar-i aniba bench-i, aluyimertem soseta asüba tebilemtsü onük ya kanga tongtibang, aser soseta asür aluyimer kibongtem nem senotsü teyari agutsüba ajanga iba tebilemtsü makoktsü, ta ashi.
SC bench-i Centre dang, “Iba onük ya kanga tongtibang. Nenok lenmang tai nung jajadar ama onoki reprangteter. Aluyimertemi bank tem nungi sen apor aser parnoki iba sentsüh maotetba ajanga soseta asür. Iba tebilemtsü atema lenmangji, soseta asür aluyimer kibongtem nem senotsü agutsübaji masü, saka soseta asüba nokdangtsü atema nenoki scheme kar benoktsüla,” ta metetdaktsü.