Exit polls March 9 nü sangdongtsü: EC

New Delhi, March 04 (Agencies): Tamalen Election Commission (EC)-i exit polls osang assembly election tembangba anogo, March 8, 2017 nü sangdongtsü atema temelaba aguja liasü, ajisüaka Uttar Pradesh aser Uttarakhand na nung assembly menden kaka atema election agitsü aliba ajanga anogo ka atsülanga exit polls osangji March 9 nikongdang ang sangdongtsü parnokisa metetdaktsü.
Uttar Pradesh aser Manipur state na nung assembly election tatembangbuba shilemji March 8 nü agitsü, ajisüaka Alapur (Uttar Pradesh) aser Karnaprayag (Uttarakhand) constituency na nung candidate ana ajungbena asüba ajanga Election Commission-i exit polls sangdongtsü atema anogo ka atsülangshiogo.
Election matongdang mesüra election agiba anogo nung recognised party tem nungi candidate kar danga ajungbena süra parnok melen candidate tasen ka shima toktepdaktsütsü atema election anogo atsülangtsü melar.
Ajioda SP aser BSP ya recognized party asübayong election anogo atsülangogo.
Tanü Election Commission-i, March 9 nü iba constituency ana nung election tembangba sülen minute 30 lir nikongdang 5:30 ako nung exit polls sangdongtsü akok, ta metetdaktsü.
Election ozüngtem nung, state assembly election tatembangbuba shilem tembangba sülen minute 30 lir exit polls osang sangdongtsü melar.