Varanasi nung Modi, Akhilesh-Rahul nungeri nüboyim

Lucknow, March 04 (Agencies): Uttar Pradesh assembly election atema Samajwadi Party-Congress teloktep atema nüboyima Honibarnü Congress tatong tir, Rahul Gandhi aser Uttar Pradesh Chief Minister, Akhilesh Yadav nati Varanasi nung külemi road-show ka nung shilem agi.
Kannauj MP aser UP Chief Minister Yadav kinungtsü, Dimple Yadav-ia Akhilesh aser Rahul na den külemi shilem agiba sülen par asem Kashi Vishwanath tekülem kidangi oa sarasadema liasü.
Osang angazükba agi, Ghulam Nabi Azad, Raj Babbar, Deependra Hooda, Jitin Prasada, Dharmendra Yadav aser party anaprong nung inyakertemi kilometer 10 road show nung shilem agitsü atema temeshi yimti, Varanasi tonga aru.
Varanasi Lok Sabha kübok assembly menden pongu nungi Samajwadi Party-i menden ana nung aser Congress-i menden asem nung tokteptsü.
2012 assembly election nung Varanasi Lok Sabha constituency kübok Samajwadi Party-i menden ka nung takok angu aser BJP-i menden asem nung takok ngua liasü.
Tanep Ato kilonser, Narendra Modi-a Varanasi tonga aruba sülen road show nung shilem agi, iba sülen pai Kashi Vishwanath tekülem kidangi oa sarasadem.
Modi-i, “UP nung vote agutsütsüpurtemi BJP nem majority agutsüogo. Onoki UP nung sorkar akumtsü, aser aluyimertem dang sentsüh atoktsü,” ta ashi.
SP lenir, Akhilesh Yadav-i, election shilem trok agiba nung Samajwadi Party jenjang tajungba lir aser shilem tenetbuba agiba sülen party-i ano sorkar akumtsü, ta ashi.
Paisa, “Round tenetbuba sülen ajak tembanger, round tenet sülen takum tasen tenzüker, yamaji Samajwadi Party-i sorkar tasen tenzüktsü,” ta ashi.
Yadav-isa, “Ato kilonseri lokti ya angu asübo, onoki takok angutsü ta pai metetla. Nüburtemi Samajwadi Party mapa aser sentongtem nung tamang akar. Onok tanaben shimra nenok taküm nung temelenshi atema onoki ano taliba inyaktsü,” ta ashi.
UP assembly election shilem tenetbuba March 8 nü agitsü. UP nung menden 403 nungi SP-i menden 298 aser Congress-i tanüngba menden 105 nung tokteper.