Commando 2 film agi mezüngnü sen crore 5.10 aazük

March 04, 2017 : Commando 2 film ya action film ka lir aser film nung raratepba mesüra züktepba shilemtemji kanga shitak amai aser tereprangnütsüka lir. Iba film ya Deven Bhojani-i direct asü aser Vidyut Jammwal aser Adah Sharma nati tongti shilem agia lir.
Bollywood actor Vidyut Jammwal-i shilem agiba Commando 2: The Black Money Trail agi box office nung mezüngnü sen crore 5.10 aatetogo, ta film yanglurtemi ashi.
Producer Vipul Shah-i, iba film agi mezüng anogo nung takok anguba ajanga film nung shilem agir aser yaritepertem kanga pelateper, ta ashi.
Commando 2: The Black Money Trail film agi mezüng sayunü sen crore 5.10 aatetbaji Commando: A One Man Army film agi sen crore 3.69 aateta aliba ajateter.
“Iba film yagi mezüngnü nung nüngtugu actor temi shilem agiba film tem aika dang nungi sen timba aatet aser ibaji ajanga nüburtemi iba film aser Vidyut agizüktetba sayur. Iba ama shilem lemsar yangluba film tem agi tejenba film agi aatetba sen ajateta aatsüji kanga tasak lir, ajisüaka Commando 2 film agibo yamaji inyaktetogo aser nüburtemia iba film kanga reprangner. Iba film ajanga sen aika aateta tenzükba asoshi onok ajak kanga pelar,” ta Shah-i sangdong ka ajanga metetdaktsü.