Park mapa nungi anendaktsütsü mapa anasa Seoul nung longkak ait

Seoul, March 04 (Agencies) : Park Geun-hye mapa nungi anendaktsütsü asoshi obendangba anogo tonga aruba mapang ka nung Honibarnü Seoul nung nüburtemi longka aita liasü.
Linük nung teraksa bener arutsü ta tai tongloktsür mapa nungi anentsütsü hopta ka tang lia, Park anemertem aser meimertemi police-i nokdangka yimti lenmangtem nung longkak aita amung.
Iba longkak aitba mapang talok ana tsüngda lendong madokdaktsütsü asoshi police ketdangsertem parnok nisung 16,000 tashi yok, ta osangbenertemi ashi.
La anemertemi ‘Tarutsü nung Park melii inyakdi’ omen nung ajemdaker longkak ait aser ano külen la pusemertemi linük wako agi abenbanger linük naklu ken den 1961 nungi 1979 tashi linük nung yimsü asüsang, Park tebu mapang nung adenba military kentem tena liasü.
“Onoki linük Tir kümzüka ayutsü aser asen linük North Korea ket nungi kümzüka ayutsü asoshi aru. Iba rara nung onok tamakok angu nungbo lendong kanga sashia adoktsü,” ta Park pusemer kati osangbenertem dang ashi.
Kasa nisung jagi, linük nung liberal telok nungi Tir adok nungbo teraksa jenti adoktsü aser North Korea den lokteper mapa tamajung iyaktsü, ta shisem.
December 09, 2017 nü South Korea Parliament-i Park la mapa nungi anendaktsütsü lemtetba agizüka ayu. Choi Soon-sil ken o nung la densema lir ta linük attorney-i la dak tai tonglokja lir.
Arishi küm 60 tain, Choi-i la tembar chijila, Park den medemtsür asüba maongka agia linük inyakyim nung teka ia ozüng alema company tulutem dang lokti tentet balala nem tenla aii agütsütsü asoshi tetuyuba agüja liasü.