2017 küm China-i military dak sen shilem 7 agi tali intoktsü

Beijing, March 04 (Agencies) : US Tir Donald Trump-i US defence budget timba küma yanglutsü ta metetdaktsüba sülen anogo ishika lir külen China-ia, taküm 2017 küm linük military atema taoba küm dang nungi sen noklang nung shilem 7 agi timba intoktsü, ta metetdaktsüogo.
Iba osang ya annual National People’s Congress (NPC) senden amungtsü anasa metetdaktsü, ta osangbenertemi ashi.
China rongsenkettsüng tashi ita akümba sülen parnok armed force-a tensa den apet melenshia odar.
China indang defence atema budget ji US dang nungi ishiba lir, ajisüaka kodang kanga junga asadangdir ibaji US dang nungi sen timba adoktsü ta China nunger mongintemi ashi.
Küm aika China military budget kasa dang aliba sülen tan iba shilem ajungkettsür.
Linük nung military tem dak intokba senji China nung lenir Li Keqiang-i Deobarnü NPC den jembiba mapang metetdaktsütsü.
Tan hopta tetenzüklen US Tir Donald Trump-i, 2018 küm atema defence budget noklang nung shilem 10 agi timba kümtsütsü bilemdar, ta ashi.
China military aser navy tashi ajanga kidanger linüktem tebilemtsü kadaktsür kechiba süra parnoki arrtsü mangatettep ajak asoshi kanga tashi ita aser sashia inyaker.
Beijing-i South China Sea nung tangar linüktemi parnok meyong ta ashiba tesem nung artificial asetkongtem yanglua lir.
Linük kümzüka ayutsü atema military tem amenoktsü asoshi item asetkongtem yanglutsüsa aküm, ta parnoki asetkong yangluba pusema ashiba mapang China-i metetdaktsü.
South China Sea nung China aser US na rongtem tsüngda mapang shia tatalokba balala ataloker. Yaküma China nunger rong kati US nunger indang tzü telong nung jajaba drone ka pua ayu, ajisüaka khen lir meyipa agütsütsü mulungtep.
Ano Vietnam aser Philippines linüktem indang rongtem dena parnok mangatetep adoka lir.
Honibarnü Fu-i, China-i yimjung olemtep anitsü, ajisüaka onok tangar talenba kübok malitsüsa inyaktsü, ta ashi.