Viola Davis nem Harvard Foundation ‘Artist of the Year’ agütsü

March 05, 2017 (Agencies): Arishi küm 51 tain, Viola Davis, shibai tawa Oscar nung ‘Best Supporting Actress’ sempet angu, la nem Harvard indang ‘Cultural Rhythms Festival’ nung ‘Artist of the Year’ sempet agütsü. Lai iba sempet ya Cambridge, Massachusetts nung Deobarnü agizük.
La nem iba sempet ya Harvard nung Neurolgy Profesor, Dr S. Allen Counter-i agizük.
Lai iba sempet agizükba mapang la taküm aser lar kibong ostü ashi.
“Ni kanga sensaker kibong ka nungi lir. Ni tanur asüdang medemer shinga maliasü, saka ni tangbo chubar jala amai bilemer,” ta Davis-i ashi.
“Ni jana indokba tesem nung chiyongtsü bushia senzü. Ni kanga ayaba ajanga tangar indang chiyongtsü auya achi. Tanur shinga ozü kidangi maru, kechiyong ozü ki kanga tejen aser koya agi sünga liasü,” ta lai ashi.
“Tangar nungi teyai agütsüba ajanga la Rhode Island College aser New York nung aliba Juilliard School zünga liasü,” ta lai shisem.
La ya actor Julius Tennon den 2003 küm kibong aküm aser tena tanur ka lir. Arishi küm 63 tain, Julius mezüng kibong akümba nungi tanur ana aser semchir tenet lir.