La Liga:Barcelona-i 5-0 agi Celta Vigo akok

Barcelona, March 05 (Agencies) : Tang tasayadak La Liga asayamung nung FC Barcelona-i 5-0 agi Celta Vigo madak takok anguba ajanga Real Madrid atsüngtoker parnok temaba jenjang tongogo.
Barcelona-i Honibar aonung asaya mezüng tesadang nung kangasa junga asayatet, ta osangbenertemi ashi.
Ajisüaka Celta team-i asaya tenzüker minute 19buba nung goal ka yoktsü maongka anguba goal meyoktet.
Asaya tenzüker minute 25buba nung Barcelona atema Lionel Messi-i mezüng goal yoka tenzük.
Ano iba sülen minute 42buba nung Rakitic-i agütsü ball ka Messi-i agizüker Neymar nem agüja goal tanabuba yok.
Khen tenchi ka lir Messi-i metsüba ball ka Celta keeper-i matokba Rakitic anasa anena pai par telok asoshi tasembuba goal ji yoka 3-0 aküm.
Iba sülen Celta Vigo asoshi iba asaya akoktsü mesüra kasa akümtsü tamakoktsü aküm.
Khen pika asayaba sülen Messi-i box telung nungi pass ka agütsüba Umtiti-i agizüka Barcelona asoshi pa mezüngbuba goal yoka 4-0 aküm.
Anungji 4-0 lia minute 65buba nung Messi-i iba asaya nung tanabuba goal yoka par telok 5-0 aküm.
Iba takok anguba ajanga Barcelona point 1 agi Real Madrid dang point timba aküm. Parnoki tang point 60 nguteta iba asayamung temaba jenjang tongteta lir.
Ano Ipurua Stadium nung asaya tanga ka nung Real Madrid-i Portugal nunger superstar Cristiano Ronaldo aser Welshman Gareth Bale na meliaka asaya mezüng tesadang nung Eibar team nem goal asem agütsü.
Benzema-i minute 14buba aser minute 25buba tem nung par telok asoshi goal kaka yok aser iba sülen minute 29buba nung James Rodriguez-ia ano goal ka yoka 3-0 aküm.
Asaya tanabuba tesadang aser minute 60buba nung Marco Asensio-i par telok asoshi goal pezübuba ji yok.
Iba sülen minute 12 shi lir Eibar team nungi Ruben Peña-i goal ka yoka asaya 4-1 nung tembang.