Kibubaji Mulunglemtet Tulu

“…. kechiaser pa taochi kodanga tatempang maka. Anepdang shia parnok tasen; nü mulung alemba tulu lir. ” (Aiatai 3:22-23)
Tanü taküm aliba aser asüng asoshi tebilemtsü ajak asenok tashi, rongsen, temetetba nung metaloktsü kecha mali, saka Kibuba taochi nung dang ajakji mulunglemtsü ayur. Khen mapang ka Hudson Taylor shiba China inland missionary liasü pai kaket ka nung yamai zülua liasu, “Kotak nung aliba Obalaji ajak rajemsang Tsüngrem. Pai pa chirtem yaa saktsü ta metet nung pai anepdang chiyungtsü moatsü, aonung ayatsü metet nung nikongdang chiyungtsü moatsür. Arem nung million asem Israel nunger pai küm 40 mesü. Tsüngremi tanü China-i missionary million asem meyoktsü akok, aji saka pai yokaka ajakji mesütsü.” Hudson Taylor-i Kibuba dak yamaji mulunglemtet tulu liasü.
Asenokbo tashi mait, tenangzükba raksar, mulung malemtsüsa inyaker alir, mesüra tamakok jenti alir. Saka Kibuba dak mulung alemtsü tulu lir kechiaser pa kodanga memelenshir. Ken zülur T.O. Chrisholm-i yamai zülu, “Oba Tsüngrem nü mulunglemtet tulu; meyipshiba nü dak kheni mali. Na memelenshir, maneni nai aochir; Na koma liasü teti kasa.”
Iba Tsüngrem dak mulunglemtsü koda tajung.