Ben Affleck aser Jen Garner na balatsü athi

March 09, 2017 : Ben Affleck aser Jennifer Garner na külemi meli-i pilar küm anashi süia ogo, aser tang tena ochi mashiba ajanga temolung melemtepi pila, ta olulu tejimbidak tiyalong nung, tenati kibong akümba küli meraksai tanaben külemi alitsü asoshi molungtetogo.
Ben aser Jen na kibong kümer küm 12 shi lir, aser dena tanur; Violet, 11, Seraphina, 8, aser Samuel, 5 ta lir. June 29, 2005 küm tena kibong aküm aser June 30, 2015 nü pila. Iba sülen Affleck-i kinungtsü toktsür par chirtem anepalur ka den tesendaktep ayuba ajanga dena pila, ta osang sangdong.
Tena pilaba sülena tanurtem asoshi kanga belimtsüa Affleck mapang tatsüka atemabo Garner kidang liasü.
Balatsüba ken o okadak benoka aliba, tanurtem anepalutsü mechi nung July tashi atema anena ata. Telung osang ka ajanga ashiba agi tena tang tashi meimtepa aliba jangjaba sülen maneni külemi lidar.
“Jen-i balatsüba ken o agienogo, lai Ben den maneni angatetteper linür aser tenapronglai kanga merangdangdar,” ta kasa osang ajangasa ashi.
“Tena longjemtsü kanga tiemlalir. Tena kati ka den kanga meimteper, aser maneni tenapronglai tanurtem kanga meimer,” ta maneni shisem.
Tang tashi nung Ben mesüra Jen napronglai iba dak sendakba ken o nung kecha telangzüba agüja mali, saka taoba ita ishika nung tena mapang shia külem noksa tangokba angur. Ano oscar temli Samuel tasoba anogo nunga kidang benjong tilaka ayonga mongogo.
“Jen-i tang tashi Ben meimer amai saka lai aji mesayur. La tanurtem dak dang temolung agütsür,” ta osang ka ajanga metetdaktsü.