FIFA nungi telok kati March 21 nü India semdangtsü

New Delhi, March 09 (Agencies): October ita Under-17 Football World Cup asayatsü aliba dak sendakba nung, FIFA nungi telok kati March 21 nungi 27 tashi India nung asayamung ayongtsüba yimtem asadangtsü asoshi semdangtsü.
Iba telok FIFA tekolakba Events Jaime Yarza-i anir March 21 nü Delhi atongtsü, aser tasüngnü Jawaharlal Nehru Stadium aser training ground tem semdangtsü. March 22 nü parnoki osangbenertem den senden ka amentsü.
March 23 nü Goa semdangtsü aser iba sülen Kochi (March 24), Navi Mumbai (March 25), Guwahati (March 26) aser Kolkata (March 27) ta semdangtsü.
Tournament director Javier Ceppi-i ashiba agi, parnok arudangbo mapa tongtitembo temer alitsü.
“Iba semdangba ya kanga tongtibang lir, kechiyong stadium ajak nung tongti shilem tembo renemer alitsüla. State ajaki FIFA nungi teshimtetba purtem arudang terenlok sayutsüji tongtibang ta meteta lir. Iba semdangba ya tatembangbuba asadangba asütsü, iba sülenbo parnoki telemtetba agir asayatsüba anogo aser telok balala telemsa sangdongtsü,” ta Ceppi-i ashi.
October 6 nung 28 tashi asayamung ayonga amungtsü asoshi yimti 6 prongla nung stadium tem yanglushidar. Maneni yimti 6 prongla nung training ground pezüzü alitsü. Asayamung atema telok lemsaba July 7 nü agitsü.