All England Championships: PV Sindhu, Saina Nehwal Quarter-i iogo

Birmingham, March 09 (Agencies): India nung nüngtugu badminton asayar P V Sindhu aser Saina Nehwal na All England Open Badminton Championship asayamung tetsür asaya nung takok ngua quarterfinal-i iogo.
Sindhu aser Saina napronglai taruba quarterfinal asaya kokra semifinal nung dena ajuruteptsü.
Teburtem asaya nung H S Prannoy-i China nunger Tian Houwei mekoki pa iba asayamung nungi tuguogo. Tian Houwei-i minute 33 nung Prannoy 13-21 5-21 agi koka liasü.
Rio Olympics nung silver medal angula Sindhu-i Indonesia tsür Dinar Dyah Ayustine 21-12, 21-4 agi minute 30 nung akok. La taruba asaya China Taipei tsür, World No. 1 Tai Tzu Ying aser Japan tsür Minatsu Mitani na quarterfinal asaya akoker den asayatsü.
Sindhu aser Ayustine na mezüng asaya tetenzüklen 4-4 liasü, saka iba sülen Sindhu-i kanga junga asayaba ajanga Austine point 12 asüdang lai mezüng asaya akok.
Tanabuba asaya tetenzük nungi Sindhu-i 9-0 agi tejakdang anir asaya, aser lai tatem nung 21-4 agi takok angu.
Tanga asaya ka nung London Olympics nung bronze medal angula Saina-i 21-18, 21-10 agi Germany tsür Fabienne Deprez ayong ayonga akok. Tena minute 35 asayaa liasü. Saina semifinal asaya Korea tsür Sung Ji Hyun aser Hong Kong tsür Yip Pui Yin na quarterfinal akoker den asayatsü.
World No. 10 Saina-i yasüng mezüngbuba asaya nung yaküm takok angula Japan tsür Nozomi Okuhara of 21-15, 21-14 agi koka liasü.
Tanü tanabuba round asaya nung Saina-i mapang ka nungbo 12-8 temaba sür asaya liasü saka Deprez-i kanga junga asayaa point 17-17 aküm, saka tatem nung Nehwal-i 21-18 agi akok. Tanabuba asaya nung Sainai-i tetenzük nung junga asayaa Deprez nem point 10 dang agüja 21-10 agi koka liasü.