Barcelona-i goal 6 agi PSG aoksatsü

Barcelona, March 09 (Agencies): Asaya tatemleni aruba mapang Barcelona telok nungi Neymar-i goal asem agütsüba ajanga Champions League nung Paris Saint-Germain (PSG) aoksatsü.
Brazil nunger Neymar-i iba asaya nung minute 88 buba nung free kick metsüdang goal ka agütsü, minute 91 buba nung penalty ajanga goal ka yoktet aser extra time nunga maneni pai goal ka agütsü.
Iba telok ana ya mezüng leg asayaba mapang PSG teloki goal 4-0 agi Barcelona madak takok ngua liasü saka Barcelona-i iba sentsüh kanga junga aodokogo.
Nou Camp Stadium nung nisung 99,000-i repranga lia asayaba nung Barcelona ya quarter-final-i iogo.
Iba asaya nung Barcelona-i akokba ya kasa stadium nung Manchester United-i extra time nung goal ana agüja Bayern Munich madak Champions League akokba aser 2005 küm AC Milan-i mezüng asaya nung Liverpool nem goal 3-0 agütsür liasü saka asaya tatem nung Liverpool-i akokba den mesükteper lir.
Iba asaya nung tamakok aluba ajanga PSG indang coach, Unai Emery ya tarutsü asoshi jenjang mejungi kümogo.
Asaya tenzüker Luis Suarez-i mezüngbuba goal agütsü, PSG nungi Layvin Kurzawa par telok tsütsü goal ka agütsü aser Lionel Messi-i penalty nung goal ka metsüoktsü. PSG nungi Edinson Cavani-i par telok asoshi goal ka agütsü.
Saka Neymar-i asaya tatemlen goal asem tashi agütsütetba ajanga PSG indang pungmang samatsü.
Barcelona telok-i 1992, 2006, 2009, 2011 aser 2015 küm Champions League kokteta lir aser tain asaya akokba ajanga par telok ya quarter-final-i 10 ben maneni ayir kümogo.