NPF-i Naga nunger temeden aser arrla 371(A) wazüka ayutsü: Achumbemo

Kohima, March 09 (TYO) : Brihostibarnü tang tasen shima aliba NPF Party atema otongdar, Achumbemo Kikon-i, osangbenertem den jembiba mapang, Naga People’s Front (NPF)-i Naga nunger temeden kümzüka ayutsü aser linük Temzüng kübok Arrla 371(A) nung Naga nüburtem atema mela alibatem wazüka ayutsü, ta nenshia metetdaktsüogo.
Ajisüaka pai ano tarutsü nunga benshia otettsüsa tetsürtem temedena ajungkettsütsü, ta jangjajangja shitsüogo.
Tetsürtem shilem 33 dena Urban Local Bodies (ULB) election magitetba sasa ashidang, Kikon-i, Naga nüburtemi kanga shisa kaa inyaktsüla kechiba süra nüburtemi akhangba ajanga State nung temaba menden nung alisang, Chief Minister, T R Zeliang pa menden nungi alutsüsa aküm, ta ashi.
Sorkar aser party teinyaktsü shilem ka ama onoki linük Temzüng kübok Arrla 371(A) wazüka ayutsü temulung nung yur ULB election agitsü sangdong, ajisüaka Naga kin lokti balalai anungba ajanga sorkari iba election magi kümdi ta sangdong.
“Tarutsü mapangtem nung Naga nunger ajak ka küma longjemer tangatetba ka nung tasü itta inyakyima aotsü onok teimla lir,” ta pai ashi.
Kikon-i, “Telungpurtemi nüburtem amokmeren masütsüla ta tesüiba mapangtem nung lokti balala ajaki jembia liasü, ajisüaka tawa state nung atalokba kodang reprangdangdir Naga nunger telok tentet balala, telungpur teloktem dang nungi tesashiba kümogo anungji iba yimyaji intoktsüla. Iba ama inyakba ajanga asen lokti aser nüburtem angsa akoksar. Nüburtem kanga shisakaa alitsü nüngdak,” ta ashi.
Sobalibaji asen ayak lir, anungji asenoki ibaji odang meyui tensa mapang apir melenshia aotsüla, ta pai shisem.
“Asenok lenitsü asoshi party nungi yimsüsür tejen ka CM mendeni atubaji asenok ajak asoshi kanga tia taka. Pai aniba teloki akokba tashi agi Naga nüburtem yimjung asoshi maneni inyaktsü,” ta Kikon-isa ashi.