Bihar exit polls tai liasü, onoki UP nung takok angutsü: Rahul Gandhi

New Delhi, March 10 (Agencies): Yashi exit poll balala ajanga BJP-i Uttar Pradesh election nung takok angutsü ta sangdonga liasü, aser ibaji magizükteti tanü Congress tatong Tir, Rahul Gandhi-i, state nung Samajwadi Party-Congress Party teloktepi takok angutsü, ta metetdaktsü.
Osangbenertem den jembidang Rahul-i, “Onoki Uttar Pradesh nung takok angutsü. Exit polls ajanga Bihar nung (taoba Bihar assembly election) tai takzütet. Asenoki March 11 nü ang jembidi. Ni opinion polls indang nung kü tebilemba mejembitsü,” ta ashi.
2015 küm November ita nung exit polls aikati, Bihar nung Narendra Modi mopungsem ka lir aser state nung BJP-i takok tulu angutsü ta sangdonga liasü. TV channel katia BJP-i takok angutsü ta sangdong, ajisüaka election osang sangdong nü Janata Dal-United, RJD aser Congress teloktepi takok tulu angu.
Hokolbar aonung TV channel tem nung exit polls indang o lemtepba mapang Rahul Gandhi’er Congress den teloktep party, Samajwadi Party tongti, Akhilesh Yadav-i BBC dang, Uttar Pradesh nung party shingaia majority mengutetra, BJP sorkar marudaktsütsü atema pai Mayawati’er Bahujan Samaj Party den lokteptsü melunga lir, ta metetdaktsüogo.
Exit polls kari Uttar Pradesh nung BJP-i sorkar akumtsü ta asadangtet, ajisüaka exit poll karibo state nung party shingaia majority mangutsü saka single largest party ji BJP asütsü ta asadangtetogo.