Facebook nung ‘Messenger Day’ sayaogo; iOS aser Android nung angutsü

New York, March 10 (Agencies): Facebook ajanga ‘Messenger Day’ sayaogo aser iba sentong tasenba amshiba ajanga medemer aser nüburtem den noksa aser video nung tobur junga inoker lemsatettsü aser ghonda 24 sülen samatsü.
‘Messenger Day’ ya iOS aser Android aliba phone ajunga nung amshitettsü.
“Iba noksa aser video ya shibaisa angutsü mesüra shiba den sa lemsanür nai shimteta lemsatsü akoktsü,” ta Head of Product for Messenger, Stan Chudnovsky-i post ka ajanga metetdaktsü.
‘Messenger Day’ ya amshitsü asoshi Messenger app ya update asütsüla aser iba app nung anü keter aliba camera nung kongshitsüla. Iba ajanga ‘full-screen’ camera sayutsü. Mesüra ‘inbox’ tekalen “Add to your day” ta zülua aliba nung kongshiba ajanga iba sentong tasenba ya amshitettsü.
Noksa aser video nung ‘art’ aser ‘effect’ amshitsü asoshi tekalen achiji nung ‘smiley face icon’ nung kongshiba ajanga inoktettsü. Noksa nung zülujang inoktsü asoshi “Aa” icon nungi inoktsü akoktsü.
Iba noksa mesüra video ya nai aginüba ama renemba sülen tsünglanglen achiji kinük nung aliba ‘arrow’ nung kongshitsüla. Iba sülen nai tangar den lemsateptsü akoktsü mesüra nai ayutsü akoktsü.
Iba noksa ya tangari reprangtettsü aser nai-a tangari yua aliba reprangtsü akoktsü. Nai noksa ka ayuba ya ghonda 24 ajungba sülen samatsü.