Tanur anema inyakba tamajungtiba state ji Mizoram

Meghalaya, March 10 (Agencies): Mizoram nung taküm January aser February ita tanur dak azüabonga tashiyim mapa inyakba ken o 23 liasü aser tesüiba küm pongu nung tanurtem dak tim mesüi inyakba ken o 712 liasü, ibayongji linük nung tanur dak azüabonga tim mesüi inyakba state tamajungtibaji Mizoram lir, ta tanü osang ka ajanga metetdaktsü.
Ketdangsertem osang ajanga ashiba agi, 2012 küm January nungi 2017 küm February ita tashi nung tanur dak tim mesüi inyakba ken o 712 liasü. Iba tetezü küm shia item ken o 140 shi benoker.
Tanur dak azüabonga benshiba anema Aizawl district child protection unit, Mizoram School Teachers Association (MPTA) aser Care World Vision, India-i senteper Aizawl nung aliba primary school tem nung tesayuba agutsüdar.
February 23 nungi tenzüka yimti nung aliba primary school 27 nung iba sentong kaogo.
Child Welfare Committee (CWC)-i ashiba agi, state nung tanurtem kümzüka mali, kechiyong tanurtem dak tashiyim mapa inyakertemji kinüngertem, kiyongertem, medemertem aser tanur tesayurtem lir.
CWC report ajanga ashiba agi, 2012-13 küm tsüngda tanur tashiyim agi raksatsüba ken o 62 liasü aser 2013-14 küm kasa ken o 41 liasü.
Item ken o 2014-15 küm nungbo 136 tashi akum aser 2015-16 küm ken o 182 tashi akum. 2016 küm nungi 2017 January 2017 tashi nung tanur tashiyim agi raksatsüba ken o 147 liasü. CWC ketdangsrtemi ashiba agi, küm shia tanurtem dak tashiyim mapa inyakba ken o kanga züindar.