Dziesielatuo Keretsu-i 11buba Open Naga Wrestling kokogo

11buba Open Naga Wrestling asaya nung  nung takok agurtem Nagaland Govt. Registered Class-I Contractors Union nung Tir, Seyiekuolie Kesiezie aser ketdangsertem den tangokba noksa ka yangi angur.

Kohima, March 10 (TYO) : Tanü Kohima Local Ground nung Nagaland Wrestling Association-i ayonga akaba, 11buba Open Naga Wrestling nung Dziesielatuo Keretsu-i takok nguogo.
Kohima yim nungi Khriezetuo Keretsu’er jabaso, arishi küm 29 tain, Keretsu-i pre-quarter final asaya nung Phek dictrict kübok Yoruba yim nungi Thupukutho Phesao madak takok angu.
Paisa ano Phek district kübok Gidemi yim nungi Niekhozo Keroh madak quarter final asaya nunga takok angu.
Iba sülen semi-final asaya nung pai Kohima district kübok Khonoma yim nungi Thekrusevi Meru madak takok anguba sülen final nung Menuosetuo Yiese madak takok ngua mezüng jenjang nung takok angu.
Tar fett 5 ser inch 11 talang aser temang touzük seret 112, Keretsu-i iba takok anguba atema sen lakh 1.50 senpet angu aser tanabuba jenjang nung takok angusang, arishi küm 18 tain, Menuosetuo Yiese sen lakh 1 senpet angu.
Kohima yim nungi asür Khrielatuo Yiese’er jabaso, tar feet 6 talang aser temang touzük seret 93, Yiese-i Phek district kübok Phusachodu yim nungi Besiihveto Cumu madak semi-final nung takok anguba sülen final tongtet.
Pai Kohima district kübok Dihoma yim nungi Zasituo Tsukru aser Sechiima yim nungi Neitseilie Zhiinyii na pre-quarter aser quarter finals asayatem nung tsükdaktsü.
Iba asayamung nung Menuosetuo Yiese-i ‘best tactic wrestler’ senpet sen 10,000 agizük.
Arishi küm 25 tain, Thekrusevi Meru-i tasembuba jenjang nung takok angu aser pai sen 70,000 senpet agizük. Pa ya Khonoma yim nungi aser asür Vigwhehuto Meru’er jabaso lir. Pai pre-quarters asaya nung Medziphema nungi Visietso Krose aser quarter finals nung Sechii nungi Petekuolie Nipu na tsükdaktsü.
Pa den tasembuba jenjang asoshi melangteptsü alisang yirur maruba ajanga pa nem iba senpetji agütsü.
4buba jenjang nung takok angusang, Phusachodu yim nungi Ziinieyi Cumu’er jabaso-i sen 50,000 senpet agizük.
Cumu-i Middle Khomi nungi Veneto Nakro madak takok anguba sülen quarter finals tongtet aser Yoruba yim nungi Vechita Khesoh madak quarter finals nung takok ngur semi final atong.
Pre-quarter final atongertem Veneto Nakro, Keneiselie Khawakhrie, Thupukutho Phesao, Khrievotuo Sekhose, Zasituo Tsiikru, Visietso Krose, Seyiesalie Gwirie aser Vevoshe Chiero nunger nema sen meyirjang pungugu (Rs 5000 each) senpet agütsü aser quarter final atongertem Keroh, Petekuolie Nipu, Neitsielie Meru aser Vechita Khesoh nunger nem sen meyirjang terer (Rs 10,000 each) senpet agütsü.
Iba melangtepba tetoktepba nung melangteper nisung 66- shilem agi. Iba malangtepba sentong nung Delhi nungi melangteper Parveen Kumar aser Konyak nungi Y.N. Shanyong Konyak natia shilem agi.
Süngo jemba mapang ‘belt wrestling’ sayaa ka sayua liasü.
Iba sentong tongti tesemdanger MLA Kuzholuzo (Azo) Nienu-i lapoktsü.
Sentong lapoktsüba mapang pai, Naga nunger ajak “O dang nungi mapa tuluba asütsü’ mapa ka agi menepogo, ta ajangajanga ashi. “Mapa tuluba inyaktsü saka o tajemba jembitsüla,” ta pai Kohima Local Ground nung senteper alirtem ayongzük.
Pai, asenoki aika jembiogo, ajisüaka asenoki jembiba ama teinyaktetba mangur. Iba amaisa ali nungbo Naga nungeri tangar lima memeneptsü, ta ashi.
Rongsenkettsüngji taküm junga aliba dang ajar aser iba nungji gari tajung, ki tajung, electricity, bullet train & locomotive, television aser mobile amala densema lir. Ajisüaka asenok item osetji junga amshitettsüsa melira aji kechi tenüngdangtsü. Item ajakji jangratema amshia aser item oset dak anisüngzüka alitsüji yimjung aser sadoksadoka litet nung dang lir, ta pai ashi.
Pai, yimjung aser teputep atema kanga bendanga agüja inyaktsüla, ta shisem.
Sentong nung tesüiba mapang Nagaland nung kilonser aser tang Nagaland Govt. Registered Class-I Contractors Union nung Tir, Seyiekuolie Kesiezie tetushi tejaoker liasü.