UP aser Goa CM nati menden nungi anenba shidi agutsü

Abelen noksa nung March 11, 2017 nü Dehradun nung Uttarakhand Chief Minister, Harish Rawat-i  assembly menden anaprong nung tamakok anguba sülen state Angh, K K Paul nem menden nungi anenba shidi agutsüba noksa angur. Ajichilen noksa nung tanü Lucknow nung Samajwadi Party-i assembly election nung tamakok anguba sülen Uttar Pradesh Chief Minister, Akhilesh Yadav-i  state Angh, Ram Naik nem CM menden nungi anenba shidi agutsüba noksa angur. 

Lucknow/Panaji, March 11 (Agencies): Assembly election nung tamakok anguba sülen Honibarnü Uttar Pradesh Chief Minister, Akhilesh Yadav aser Goa Chief Minister, Laxmikant Parsekar nati state Angh nem menden nungi anentsü shidi agütsüogo.
SP lenir aser UP CM, Akhilesh-i agutsüba shidiji Angh, Ram Naik-i agizükogo, ajisüaka khen atema maneni CM menden bena atatsü asüngdangogo, ta tanü Raj Bhawan otongdar kati metetdaktsü.
Takok anguba sülen Akhilesh-i osangbenertem senden ka ayonga jembi, iba sülen pa menden nungi anenba shidi agutsütsü atema Raj Bhawan-i ilonga ao.
Osangbenertem senden nung pai, par party-i tamakok anguba kulitem bushitsü, ta ashiba den külemi, nüburtemi ano terenlok taliba aginüba nung ajemdaker vote agütsü südi, ta ashi.
Akhilesh-isa, “Ni amanger, sorkar tasenbai SP dang tajungba inyaktsü. Onoki yangluba Expressway ji nüburtemi maginüi parnoki bullet train atema vote agütsü südi. Onoki gari lenmang tajung yangluogo saka UP nüburtemi iba jagi melung mesüi ano lenmang tajungtiba aginü südi. BJP-i gari lenmang tajungba yanglutsü südi,” ta ashi.
BJP aitsüba olen ka nung Akhilesh-isa, “Onoki aluyimertem dang sentsüh sen crore 16,000 tokogo. Ni amanger, BJP-i India tesem ajungalen aluyimertem sentsüh atoktsü südi,” ta ashi.
Ano külen BJP lenir aser Goa Chief Minister, Laxmikant Parsekar-ia party-i tamakok anguba sülen CM menden nungi anenba shidi Angh, Mridula Sinha nem agutsü.
Arishi küm 60, Parsekar-i Madrem constituency nungi toktep, saka Congress candidate Dayanand Sopte-i vote 7,000 tali agi pa madak takok angu. Parsekar-i vote 9,371 angu aser Congress lenir Sopte-i vote 16,490 angu.
Goa nung CM densema cabinet minister teneti tamakok angu.
Osangbenertem den jembidang Sopte-i, “Vote tali 5,000 tetsüngda aitbaji ajanga nüburtemi Chief Minister mapa nung mepelai liasü ta kuli sayur,” ta ashi.
Chief Minister dak alia tamakok angur cabinet minister tem rongnung Tourism Minister, Dilip Parulekar, Water Resources Minister, Dayanand Mandrekar, Industries Minister Mahadev Naik aser Minister for Factories & Boilers, Deepak Dhavalikar nunger desema liasü.