Longpayimsen nung 69 buba Naga Independence Day amung

Longpayimsen (Mokokchung), August 14 (TYO) : Longpayimsen Public Ground, Mokokchung nung 69 buba Naga Independence Day sentong ayongzüka agi aser iba sentong nung tongti tesemdanger NSCN IM Chaplee Affairs Ministry ketdangser Limachuba liasü.
Tanü sentong nung jembidang Limachuba-i ashiba agi, India sorkar aser NSCN (IM) tsüngda ‘framework agreement’ agiba ajanga Naga nunger lokti nung tensa melenshiogo.
Tanü asenoki sepaitem dang nungi tetsükdaktsü kecha melii dang Naga nüjiso anogo amunger aser asen Naga nisan timtem melii ayipdaktsür, ta pai ashi.
Küm 18 tashi ceasefire aliba aser olemtepa aruba ajanga süngjang tajung tangogo. Iba tenangzüktep ya telok ana tsüngda tashi lemsatepba aser telok ana külemi liyonga aotsü atema lir, ta Limachuba-isa metetdaktsü.
Asenok den kidangsüa aliba state tem nungi Naga nunger aliba tesemtem ka akümtsü indang onük atema jembidang Limachuba-isa ashi agi, ka küma longjemtsübaji lokti sasep nung asütsü aser ibaji atema Naga nunger ajak adenba telok ka tentettsü aser parnoki Naga nunger aliba tesem ajungalen ketdangsütsü.
“Nenoki framework ji mapa küma inyaka aodang angutsü, shibai metet iba yagi Naga nunger zünger mapa manguba khuret dena koktettsü akok” ta paisa shisem.
Paisa, Ao Senden, Watsü Mungdang, AKM, Senior Citizen Forum, Mokokchung aser nübortemi iba mapa nung NSCN I-M den yariteptsü ayongzük.
Tanü agiba sentong nung Maj (Retd) Maong Ozukum, Dy. Kilonser (Chaplee) cum caretaker CAO, Ao region-i okila jembi aser Ao Kaketshir Mundang tir L. Jemti Longchar, concerned senior Citizen forum, Mokokchung nungertemi o tatsütsü jembi. Sentong nungsa Dust ‘N’ Gold, Tongusen Longpayimsen aser Imlibenla & sisters nungertemi ken aten.