Modi takok, Rahul tamakok

Tan India nung state pongo nung assembly election agiba rongnung, talisa, UP nung Narendra Modi’er BJP teloki takok anguba takok yabo meimlaba takok tuluka liasü. Aji oda, Modi atema takok tuluji Congress lenir Rahul Gandhi atema tamakok tuluka asütsü. India yimten nüchiso nguli nungi Jawaharlal Nehru, Indira Gandhi aser Rajiv Gandhi taküm ali tashi UP ya mapang talangka Congress amongdak tesem ka liasü. Atangji, UP nung BJP telok ya tasen masü. Parnokia küm 25 jakdang anaben asemben kabo UP nung government bendanga lir saka tang anguba takok amaibo kodanga mengudang. Aji oda, 1989 küm N.D.Tiwari chief minister asüba sülenbo UP nung Congress tashi maitba küma adok aser BJP telok danga Mulayalam Singh Yadav-i aniba Samajwati Party aser Mayawati-i aniba Bahujan Samaj Party tashi taitba küma adok. Iba amaji India nung National party tuluba ana Congress o BJP na madak takok ngur 1993 küm nungibo SP teloki khen aser BSP teloki khen ta UP nung yimsüsüa aruba tang BJP teloki telok anapronglaji jungjunga kokogo. Atangji, BJP teloki Uttarakhand state nunga takok tuluka nguogo aser ano Goa o Manipur na nunga menden aika nguogo. Ajisüaka, UP nung takok anguba tetkabo masü. India nung state 29 rongnung UP state yasa tuluba, anungji UP assembly nung takok angubaji UP government asoshi dang masü saka center government asoshia kanga tongtibang lir. Aji oda, assembly seat 403 nungi BJP teloki 311 anguba jagi UP nung dang masü saka joko taruba Lok sabah election nunga UP nung menden 85 nungi 60-bosa angutsü teimla tulu lir. Aji oda, tang ama election agiba sülen takok angur asoshi takok anguba kuli aser tamakok angur asoshia tamakok anguba kuli bushitepdang tenüngsang süli, nüngsen süli leniri agitsü alinungji, UP nung BJP teloki takok anguba tenüngsangji Narendra Modi nem agütsütsü tetemsü. Narendra Modi ya Gujarat nung chief minister küm 12 inyakba yimsüsür lir. Atangji, yimsüsür asünungji pa anema jembiba ken o aika lir saka pa dak tarak atutsüsa pai ochimashi inyakba otsübo mali. Ano, nübortem asoshi tajung kaji pa kibong mali, pa kija anungji pa khuret ajak agi nübortem anepalutsüba dang lir. Pa asoshi rongsen rezüngtsü menüngdaker, iba jagi balaka ochishia yimsüsütetter. Iba denji pa dak yimten ken o jembitsü aser yimsüsütsü sempet, tashi aser ain lir. Aji oda, pa nükjidongji India nung ochimashi mapatem anema raratsü aser nübortem timtem aser makamait tia nungi anitettsü temulungtetba lir ta jembia senzüba agi, talisa, India nung teküpbok jenjang nung alirtemi pa aginer, iba jagi parnoki BJP yarir. Ano, külen SP aser BSP telok yutsür Congress telok tamakok indang bilemdangra, Rahul Gandhi ya Rajiv Gandhi masü, anungji paji joko Congress teloki election mapang wajak nungbo mamshitsüla ta angatetter. Tang UP election nung SP tanishiba Akhilesh Yadav-i Congress telok nem menden noklang dak tali agütsür külem telongjem nung tokteptsü renembaji Congress asoshibo maongka tulu liasü. Ajisüaka, UP nung Congress tiaji tanishirtem dak alaka nübortem rongnung Congress sapur aika mali kümogo ta jangjar. Atangji, tamakokji takok tongshi kümdaktsür, tang election nung SP aser BSP teloka mali ama kümadokbaji Congress asoshi jenjangpong tasen yangludak kümdaktsür nokdakdi asünungbo, UP nung telidak yimten angatetba nisung aser nübortem den litetba lenirtem shimtsü nüngdaker. Iba denji election nübo yim nung Gandhi’er kibong nungi shilem agidi asünungbo, Rahul masü Priyanka Gandhi amshi tajungba asütsü. Joko, Rahul yabo Vice President masü saka AICC nung general secretary ser office nung amen tajungba asütsü amai kümogo. Aji oda, pa melen Gandhi’er kibong nungisa mesüaka Rahul’er züngar Congress nung yimsüsür tajung aika lirji, item nemji ken anidaktsü tajungba asütsüa akok. Narendra Modi takok angubaji, talisa, BJP ajungba agi masü saka Congress majungba agi akoker. Congress noksaji kanga ochimashi aser Nehru’er kinungertemi dang India amokbangnür ta Narendra Modii taolen ajak nung jembir aser Congress teloki ibaji nunga ta meshitetter. Aji oda, tawa linük nung sen melenba ajanga Modi jenjang majungtsü amai bilemyonga, sensakertemi ibaji ochimashi mapatem nokdangtsü inyak ta angatetba agi parnok ajaki UP election nung BJP yari südi.