AAP pur tasembuba jenjang nung election tembang

New Delhi, March 12 (Agencies): Punjab election nung Aadmi Party (AAP) puri menden 20 koka liasü. Constituency 26 nungbo parnok tanabuba jenjang nung liasü, saka AAP candidate parnok 20 shi vote tangutsü lateta toktsüba mongutetba ajanga security deposit meyipa mangu.
APP pur den teloktep party Insaaf Party-i menden ana koka liasü.
AAP candidate 62 Congress aser SAD-BJP telokteba party sülen tasembuba jenjang nung liasü. Bhoa, Fazilka aser Mukerian tesemtem nungbo parnok pezübuba jenjang nung liasü, ta Deobarnü election osang ajanga metetdaktsü.
Sujanpur nung APP pur Bharatiya Janata Party, Congress, Independent candidate aser Revolutionary Marxist Party of India sülen 5buba jenjang nungang liasü.
Election nübuyimba sentong aser February 4 nü election agiba sülena, APP nung lenirtemi Punjab nung assembly menden 117 nung 100 tashi akoktsü, ta temolung lema jembia liasü.
APP candidate rongnung parnok 25 bo election inyakyim nung candidate shiai vote telatet kabosa angutsü lateta toktsüba mongutetba ajanga parnok indang security deposit meyipa mongutet.
Vote telemdang nung Congress-i menden 77 koka parnoki shilem 38.5 agi. Shiromani Akali Dal-i menden 15 koka vote ajak senteper telemsa nung shilem 25 agiba sülen APP-i shilem 23 agia parnok iba election nung tasembuba jenjang nung tempang.
BJP aser Akali na teloktep party-i menden asem dang koka parnok shilem 5 dang liasü.