UP aser Uttarakhand akokba sülen BJP-i India Tir shimtsü maongka tuluba akümer

New Delhi, March 12 (Agencies): Yashi BJP ajanga takok anguba ola tesashi ya Uttar Pradesh (UP) alema oa, Rajya Sabha aser Rashtrapati Bhavan nunga angashitsü.
UP Assembly nung menden 403 nungi BSP-i menden 19 kisüng ngutetba ajanga par telok lenir, Mayawati-a kanga aoksatsüogo.
UP aser Uttarakhand nung BJP teloki takok anguba ajanga India nung taruba Tir ya par teloki molungba shimtettsü maongka tuluba kümogo.
Tang India Tir teinyakdak, Pranab Mukherjee-i pa menden nungi taküm küm July 24 nung alutsü lir. India Tir shimtsü asoshi June nung sangdongtsü.
India Tir ya vote 4896 agütsür aliba ‘electoral college’ ajanga shimtsü aser iba ‘electoral college’ nung ya MLA 4120 aser MP 776 lir.
India Tir shimba nung Lok Sabha Speaker-ia vote agütsütettsü saka Lok Sabha nung Anglo-India kin nungi shimoka aliba züngsem ana aser Rajya Sabha nung shimoka aliba MP 12-i vote magütsütettsü.
MP ajunga indang vote tashi ya kasa asütsü saka MLA indang vote ya par state tasazük nung ajemdaker alitsü.
‘Electoral college’ nung aliba vote ajunga indang tashi ya 10,98,882 lir.
Assembly election magiba NDA indang vote tashi ya 75,076 liasü, saka BJP ajanga UP, Uttarakhand aser Manipur nung kanga junga asayatetba ajanga par telok ya vote 20,000 agi dang tetsüngda aittsü, ta Election Commission ajanga ashi.
AIADMK indang MLA 134 aser BJD indang MLA 117 nungi parnok den densemra, BJP ajanga India Tir ya shimtsü akoktsü.
Rajya Sabha nung züngsem 243 aliba nungi BJP züngsem 56 aser Congress züngsem 59 lir. Saka yashi BJP-i takok anguba ajanga taruba küm Rajya Sabha nung par telok nungi züngsem timba akümtsü, saka par telok ya ‘majority’ bo mangutsü.
Mayawati indang telok, BSP nungi menden 19 dang angu aser iba ajanga la taruba küm Rajya Sabha nung menden mangutsü.