Angh-i security agency & sorkar ketdangsertem den senden amen

Kohima, August 14 (TYO): Tanü August 14, 2015 nü Nagaland Angh, P.B. Acharya-i pa office takdang nung state sorkar tongti ketdangsertem aser Assam Rifles den CRPF ama security agency tem den senden ka ayonga tang state tensa indang lemtepogo.
Iba senden nung Chief Secretary Pankaj Kumar, Director General of Police, L. Dongel, Home Commissioner N. Thur, Inspector General Assam Rifles Maj Gen M.S. Jaswal, Officiating DIG CRPF, Niraj Yadav aser Intelligence Department nungi tongti ketdangsertem denogo. Iba senden nung Angh den inyaker Commissioner & Secretary, Sanjay Kumar-a dena liasü.
Iba senden nung jembidang, Angh Acharya-i, Government of India (GoI) aser NSCN(IM) na tsüngda tezüngzüktepji telok anatsülen nungi kati ka dak temulung lemteta süoki ia benshitsüla, ta ashi.
Angh-isa state nüburtem dang, teti asoshi yimjung aser Nagaland nung terenlok mapa kara inyaktettsü asoshi Independence Day benjungmong nung sarasadema arua dendaktsüner ta mepishia metetdaktsüogo.