Anogo ishika tsüngda Queen-i Brexit bill mapa akümtsü temelaba agütsütsü

London March 14 (Agencies) : Mongulbarnü Britain Ato Kilonser Theresa May-i, “Queen Elizabeth II-i sorkari agizüka yua aliba Brexit bill mapa akümtsü asoshi anogo ishika tsüngda nung temelaba agütsütsü,” ta metetdaktsü.
May-i, aruyaa aliba anogo ishika tsüngda nung chubatsüri temelaba agütsütsü imlar aser iba sülen European Union (EU) den kechisarena telemtetba agitsü asoshi kü nem tashi benloktsütsü, ta ashiba osangbenertemi metetdaktsü.
March ita matem dangsa Commons telok dangi oa yangji aliba MP tem dang lai Arrla 50 arakzüdaktsüba metetdaktsü nangzükogo.
“Iba mapa ajanga asen linük Europe den tesendaktep balaka akümtsü aser asen sasep nung alima atema inyakyim balaka tenzüktsü,” ta May-i ashi.
“Asenoki tashi ita yimsü asütsü aser tanaben asen arrtsülen azüoka asen ozüng amshitsü,” ta lai ashi.
May-i, “Tang ya asen linük longjemer asen linük nüburtem senmang akümtsübua tajungba küma yanglutsü mapang lir,” ta shisem.