Malaysia:Kim Jong-nam temang shizüka aoba agi mozützü agütsü

Kuala Lumpur, March 14 (Agencies) : Malaysia sorkar-i, North Korea lenir Kim Jong-un tedi Kim Jong-nam indang tasümang shingaia arua mamanglemi shizüka aoer asüba agi Kuala Lumpur nung mozützü agütsü, ta metetdaktsü.
“Iba tasümang odang yutsünungbo shizüka omatsü asüba agi onoki yamaji inyak,” ta Deputy Prime Minister Ahmad Zahid Hamidi-i osangbenertem den senden ka amendang ashi.
Arishi küm 45 tain, asür Kim Jong-nam February 13, 2017 nü VX nerve agent, chemical agi tepseta südaktsüba ajanga North Korea aser Malaysia na tsüngda tera meputepi kümer aliba mapang ka nung Malaysia nungeri pa tasümang meshidaktsütsü mozüji agütsü.
Pyongyang-i Kim Jong-nam ji temulungjang tashidak agi asü ta shia Malaysia nung putetbaji US tebilemba atalokdaktsütsü asoshi South Korea sema inyakba mapa ka lir ta ashir.
Ibaji langzüa Malayasia-i March 6, 2017 nü North Korea ambassador par linük nungi yokogo aser ano tang North Korea nunger Borneo asetkong nung Sarawak nung mapa inyaka alirtem parnok nisung 50 tashi par linüki meyipa yoktsü sentong lir. Ano külen North Korea nunga Malaysia nunger nisung 9 pua yua lir.
Hombarnü Malaysia Health Minister Subramaniam Sathasivam-i Kim Jong-nam’er kinungrtem dang hopta asem tsüngda pa tasümang arua amanglema bener aotsüla ta metetdaktsüogo.