Turkey-i Netherlands nem tenokdangba agütsü

Ankara, March 14 (Agencies) : Turkey Deputy Prime Minister Numan Kurtulmus-i, “Turkey yimsüsürtemi Netherlands nunger nokdangtsü,” ta Netherlands nung bangdakpuri Turkey yimsüsürtem Rotterdam, Netherlands nung senden magidaktsüi nokdangtsü metetdaktsüba sülen ashi.
Iba tenokdangbaji tang tangbo yimsüsüba inyakyim kübok alitsü, ta Netherlands tenokdangba asadangtsü asoshi cabinet senden ka amenba sülen Hombar aonung Kurtulmus-i osangbenertem dang ashiba osangbenertemi ashi.
Tang aieni orr alisang, Netherlands nungi Ankara nung ambassador Tirkey-i akhangba Netherlands-i mataloktsü tashi Turkey-i maitdaktsütsü, ta Kurtulmus-i ashi.
Turkey sorkari Netherlands den tesendaktep aser senden amentsü sentong yanglua aliba ajak thiogo, ta pai ashi.
Turkey sorkar-i Turkey aser Netherlands na tsüngda yimten tesendaktep anentsü asoshi tebilemba ka benoktsü, ta Deputy Prime Minister-isa ashi.
Yaküm December ita Netherlands yimsüsürtem jajatsü asoshi tayimtsü mela aliba dena thitsüogo, ta paisa ashi.
Netherlands-i Turkey Foreign Minister Mevlut Cavusoglu arutsü aliba tayimtsü nokdangba aser Honibarnü Turkey Family Minister Fatma Betul Sayan Kaya Rotterdam nung aliba Turkey embassy-i meyoki nokdangba ajanga linük ana tsüngda tensa mejungi aküm.