Temelenshi nüngdaker !

Asen lima nung temelenshi nüngdakba indang jembia-jembia temelenshibo arur saka tamajungba küma melenshiba ajangshir. Temelenshibo temelenshi saka tamajungba küma melenshir asünungji nübortem timtatemba atemer. Government melenshir saka tamajungba dang, nisung kar melen kar shimer saka tamajungba dang ta asenok memelenshitet akoksar. Iba amaji tanü tashi asenoki tajungba küma melenshinüaka temelenshi tajung ka tenzükdak maka asenok shisabolur. Aji oda, government melenshir saka tamajungba dang, nisung kar melen kar shimer saka tamajungba dang ta asenok melenshinüseta memelenshitet mapang talangka arudagi. Iba tebilemtsü ya kokteta asenoki asen lima aser asen jenjang kodaser melenshitettsü ta  kanga aroka bilemtsüba mapangji tang lir. Ashiko, asenoki temelenshiji tangar dak nungi tenzüktsü ama bilema tangar dang melenshitsütsü merangba agi temelenshi tajung ka marur asütsüa akok. Mesüra asenoki asenok dakbo temelenshitsü kenyongi mali ama bilemba agi asen lima memelenshir asütsüa akok. Iba amaji asenoki asenoksasa asenok dak temelenshitsü aliba jakla aser tesemtem reprangdangra aika reprangtettsü. Mapa temerang meinyaknerji asenok, asentzü malu ser takar kümnerji asenok, lesson mebushi ser jenjang tajung nung takok ngunerji asenok, kecha memetet ser sen agi alia tulur menden nung menerji asenok, mapa meinyak ser chiyongner aser mapa meinyak ser süoshi tajung aginerji asenok, ayongayonga ita sen aser anogo sen tulu angutsü imlarji asenok, tatidang magi ser mapai inürtemji asenok, asenok dak malangyonga tangar alema tua menertemji asenok, pei vote dang masü saka tangar vote dena yoktsütsü election  aru atartemji asenok, tangar melen senotsü agizüka chitsütsüba nung mongin nisungtemji asenok. Iba amaji ochimashi aser külakküpbong mapa inyakba ajanga takar akümertemji asenok lir. Item temeenentemji asenoki asenoksasa nembanga yur asenoki asen lima nung temelenshi tajung ka arutsü yongyar. Ibaji Tsüngrem tsüngdang tejashitsüka aser külenbo temenünütsüka lir. Tanü temelenshi nüngdakbaji tangar masü asenok melenshitsü nüngdaker. Aseni asen alidak yimti yimdong merüka yunüra tangar kima masü tamasa asen kima merüka yutettsüla. Atangji, karibo pei kilong aser kima nungi janaona ajak okdena bener oa tangar kima nung endoker. Iba ama jaklajia asenok dak lir. Ajisüaka, tangar kima janatsüba jagi asen kima merükbaji kecha tetezü maka akümer. Iba kasaji asenok inyakyim nunga asenoki asen melenshiba ajanga tangar melenshidaktsütsü merangtsü melen asenoki inyakba ajanga tangar den menendaktsür. Atangji, tanü Nagaland merüktettsü mapang tongogo. Iba merüktettsüba mapa nung nübortem meyong rongsen auyadena bendenertem , nisung tepsetertem , peisasa pei taküm azüoka melitettertem aser mapa meinyaki chiyonga linür takümtem tama melenshitsüla. Ibai mapa temela masü. Iba ama temelenshi tajung ka bener arutsü asoshi ochimashi, tashiyim aser azümasen temenentem anema tashi aser tasü itta nokdaktetba purtem nüngdaker. Aji oda asenoki asen lima nung temelenshi tajung ka nüngdaker ta bilemra, tamasa asenok melenshidi aser iba temelenshi nung jagi tenzüker government inyakyim  dena tajungba aser shitakba küma melenshidi. Tanü asen lima melenshitsü nüngdakba ya tanü alirtem asoshi dang masü saka tarutsü putu nung alirtem asoshi alima tajung ka yanglua toktsüner. Iba tangatetba aser nükla nung  asen lima melenshitsü asoshi nisung shiai timtem kabosa agitsüla. Iba timtemji peisasa pei taküm ochishia alitsü merangba timtem asütsü.