Rahul Gandhi Lok Sabha nung Opposition lenir shimtsü

New Delhi, March 16 (Agencies): Tawa state pongu assembly elections nung Congress Party-i tamakok anguba sülen party nung temelenshi nüngdaker, ta aikati jembiba mapang ka nung Congress tatong Tir, Rahul Gandhi Lok Sabha nung Opposition lenir shimtsüsa akok, ta osang ka ajanga metetdaktsüogo.
Tanü osang ka ajanga, Congress lenir tain aser Lok Sabha nung opposition lenir, Mallikarjuna Kharge Public Accounts Committee (PAC) Chairman shimogo, anungji Rahul Gandhi-i pa melentsüa akok, ta ashi.
Kharge ya 2014 küm nungi Lok Sabha nung Opposition lenir lir aser April ita nungi pa PAC tongti asütsü, aser pa deputy, Captain Amarinder Singh-a Punjab Chief Minister atema tenangzükba agiogo.
Tang mezüng Congress-i Lok Sabha nung Opposition lenir ka PAC tongti shimmer.
Anungji taküm küm tatemlen tashi nungbo Rahul Gandhi Congress tongti shimtsüa akok.
Party nung lenir kari Rahul Gandhi ji Congress Parliamentary Party (CPP) tongti aser 2019 küm Lok Sabha election tashi Opposition lenir asutsüla, ta ashir.
Ano külen India south tsütsü nungi lenir ka Deputy CPP lenir shimtsü akok, ta osang angazüker.
Taoba mapang Congress lenir, Madhavrao Scindia’er jabaso Jyotiraditya Scindia Deputy CPP shimtsüa akok, ta osang angazüker.
2014 küm Rahul Gandhi lenisüba nung General Elections nung Congress-i menden 44 dang nguteta liasü, aser tanü tashi nung ibaji tamajungtiba lir. Ano maneni Uttar Pradesh aser Uttarakhand assembly election nunga parnoki tamakok anguba ajanga Congress jenjang mejungi kümogo.
Ano Rahul Gandi lenisüba nung melung masür Congress lenir karibo Rahul-i Akhilesh Yadav-i aniba Samajwadi Party den loktepba atema jashir.