Elections nung BJP-i takok angubaji China atema majung: China

New Delhi, March 16 (Agencies): India linük sorkar tashi nung aliba party, Bharatiya Janata Party (BJP)-i state elections nung takok angubaji ajanga International onüktem nung New Delhi den ken o jembitsü atema tali tasaakba akumer, ta China linük meyong, The Global Times ocet ka ajanga ashi.
The Global Times ajangasa, Ano Ato kilonser, Narandra Modi-isa taruba election nunga takok ngura India-i tang masetshiba ama maneni masetshitsü, ta ashi.
“Sen tamshidak anentsüba aser Modi indang tangatetbatem ama pa indang linük mapatongtemji kasa lir. International sabang nung, tamalen India-i shinga mejashidaktsütsü merangba tu pai melenshitsüogo aser pei ajangzüktsü atema tanga linüktem den mangatettep adoker,” ta ocet nungji shia lir.
“Linük anapronglai melungra Modi yimsüsüba mapang nunga Delhi den arrtsü mangatettep densema mangatettep onüktem bentettsü ta onoki imlar,” ta China-i ashi.
Ajisüaka kasa ocet nung, Ato kilonser, Modi-i China aser Moscow naprong den tesendaktep yangluogo, aser Shanghai Cooperation Organization (SCO) nunga züngsemtsü benokogo, ta ashi.
Tang tashi Beijing aser New Delhi na tsügda tesendaktep kanga jungabo mali, ta shia China-i, Ato kilonser, Modi-i China-India arrtsülen sepaitem den Diwali benjung külemi amungba ajanga pa tangatetba sayuogo, ta ashi.
“Modi-i terenlok atema jembiba ajanga pa shim. Tang tesüsa pai takok angubaji (assembly elections) terenlok aser rongsenkettsüng o foreign investment onük nung ajemdaker takok angu. Pai nangzükba ajak meinyaktetaka pa ya mapa agi inyaker nisung ka, ta kuli sayuogo,” ta kasa ocet nung shia lir.
McMohan Line densema China aser India na onük aika nung mangatettep adoka lir.
McMahon Line ya 1914 Simla küm Convention nung British India aser Tibet na tsüngda latet, ajisüaka China-ibo ibaji ashishir.