KV nung mapa tazüng 10,000 atema taküm sa shimtsü: Sorkar

New Delhi, March 16 (Agencies): “India tesem balala nung Kendriya Vidyalaya (KV) indang kaket rejutem nung mapa tazüng 10,000 dak tali lir, aser item mapatem atema sorkari taküm nisung shimoktsü,” ta HRD Minister, Prakash Javadekar-i tanü Rajya Sabha nung metetdaktsüogo.
“Kendriya Vidyalaya nung tesayur 6,206 shimoktsü asoshi maparen tenzükogo aser tezüluba tatidangbo taoba küm December nung agiogo,” ta Javadekar-i Rajya Sabha nung ‘Question Hour’ mapang ashi.
“Iba den külemi KV nung inyaktsü asoshi nisung 4,478 shimtsü atema Limited Departmental Examination (LDE) ajanga CBSE-i shimtsü,” ta paisa shisem.
“Andhra Pradesh state kisüng nunga KV 31 lir aser tesayur post 449 tazüng lir. Iba amala post tazüng aliba nung shimloktsü asoshi maparen ya temzüng nung aliba ama maneni inyaker,” ta Minister-i ashi.
“Tesayur telemsa asem prong nem itasen kasa dang agütsür aser teti asoshi tesayur shimtsü atema sorkari merangba mapang lir,” ta contract nung inyaker itasen indang asüngdangba mapang, Minister-i ashi.
“Kaket shisatsü tajung agütsütsü asoshi sorkari KV tali lapoktsü sendong lir,” ta paisa shisem. Kendriya Vidyalaya tasen 35 lapoktsü asoshi cabinet-i yashi agizükogo.