Akshay Kumar-i asür kibong 12 nem sen lakh tokuku agütsü

New Delhi, March 16 (Agencies): Bollywood actor Akshay Kumar-i maneni mapa tajunga ka inyaka asür kibong 12 nem teyari agütsüogo. Küm 49 tain actor-i Sukma amakba lendong nung asür kibong temnem, sen ajak senteper crore 1.8 tenla agütsüogo.
Central Reserve Police Force-i Brehostibarnü twitter ajanga Akshay tenla tajung atema tenüngsang agütsü. “Akshay Kumar ya linük meimba nisung ka lir, pai asür kibong 12 den asüku lemsatepa sen lakh tokuku tenla agütsüogo. CRPF-i iba mapa tajunhg atema salute asür,” ta CRPF-i tweet asü.
Honibarnü Chhattisgarh, Sukma district nung telungpurtemi CRPF purtem mita lir amakba nung sepai parnok 4 yiru aser 12 khaseta liasü. Iba tatalokba ya Bhejji police station kübok state yimtiba nungi kilometre 500 shi pilar Kottacheru yimtsüng anasa arem nung anepdang 9:15 ako nung atalok. CRPF 219th battalion pur parnok 112 lenmang lapokba mapa nung senzüya alidang telungpurtemi maka liasü.