Trump White House nung kümzüka mali

WASHINGTON, March 18 (Agencies) : Taoba mapang US Tir tem anüker, Secret Service agent kati, US Tir Donald Trump White House nung kümzüka mali aser kiralongrari amak nungbo Secret Service-ia dena pa mekümzüktettsü, ta metetdaktsü.
Taoba mapang Secret Service agent, Dan Bongino-i iba o ya nisung kati White House atsü pungdanga aiter minute 15 dak tema security kanga sashia aliba tesem nung kazüa lia apuba sülen ashi.
“Iba nisung jagi memeteti aitba nisung kar lir ta metetdaktsüba alarm tem aika asadaktsü, saka White House anükertemi paji nguaka kecha tamajung mebilem. Ya otsü tulu lir,” ta Bongino-i ashiba osangbenertemi ashi.
Bongino-i taoba mapang US Tir tem, Obama aser George W Bush na anükba mapa inyaka liasü.
“Iba ama memetetba nisung ka White house telungi aitba ajanga US Tir ji iba ki nung asü yonga kümzüka maliba sayur. Secret Service ket nung Tir kümzüka ayutsü asoshi nüngdakba hadir ajak mesüra nisung peria mali,” ta ashidang pai, kiralongrartemi amak nungbo Secret Service-i US Tir mekümzüktettsü, ta shisem.
“Secret Service-i nisung ka kijaa menokdangtettsü nung kiralongrar 40 shii White House nungpoka ait nung koma asütsü ? Kiralongartemi item tasa ajakji yangludar,” ta Bongino-i ashi.
East Executive Avenue aser Treasury Department complex anasa aliba White House atsü aonung 11:21 akok nung arishi küm 26 tain, Jonathan T Tran-i alema aitba sülen 11:38 ako nung apu.
Iba mapang Trump-a kidang liasü.
Obama aliba mapang White House nung aiben ozüng alema atsü alemdanga aitba ataloka liasü, ajisüaka Trump Tir akümba sülenbo tan ya mezüng lir.