India nunger putir ana Pakistan intelligence agency ket nung lir

Delhi/Lahore, March 18 (Agencies): Delhi nung aliba Hazrat Nizamuddin Dargah nung India nunger putir ana Muttahida Qaumi Movement (MQM) den tesendaktep lir ta tai tongloja tena Pakistan intelligence agency ket nung lir, ta tanü Pakistan ketdangsertem osang ka ajanga metetdaktsü.
Syed Asif Nizami aser par kinünger Nazim Nizami na March 14 nü Allama Iqbal International Airport, Lahore nung Karachi-i aoba Shaheen tayimtsü nungi anizükja liasü, ta parnoki ashi.
“Iba sülen intelligence sepaitemi putir anapronglaji asüngdangyatsü atema mejangjaba tesem kati anir ao,” ta osang ka ajanga ashi.
Altaf Hussain’er telok MQM nung tesendaktep aliba ajanga putir anapronglaji apu, ajisüaka tena anema kuli mengura chioktsü, ta parnokisa ashi.
Arishi küm 80 Asif Nizami ya Hazrat Nizamuddin Aulia Dargah nung tongti putir lir, aser par kinunger Nazim Ali Nizami tena par aianu Karachi nung ajurutsü atema March 8 nü apusoa liasü. March 13 nü tena Lahore atongba sülen Pakpattan nung temeshi tesem ka semdang, saka March 14 nü Lahore nung tena sama.
Iba sülen India-i Pakistan ketdangsertem dang India nunger senso ana dak tamajung kecha mataloktsü atema mepishia liasü.
MQM lenir Hussain-i yaküm Karachi nung Pakistan linük anema jembiba sülen nungi Pakistan-i MQM anema inyaker.