Sorkar akumtsü atema Digvijaya Singh-i onok nokdang: Falerio

Panaji, March 18 (Agencies): Tawa Goa Assembly election nung Congress-i BJP dang nungia menden aikati timba nguaka party-i sorkar mekümtetba atema Goa Pradesh Congress Committee (GPCC) tongti, Luizinho Faleiro-i AICC general secretary Digvijaya Singh aser Goa screening committee tongti, KC Venugopal na nem tai tongloktsüogo.
Goa nung Congress lenirtem Chief Minister menden raktepdang sorkar akumtsü meno ta prokba osangji tai, ta shia Faleiro-i ashiba agi, Congress-i sorkar akumtsü atema MLA 21 nüngdaka liasü; Digvijaya Singh-i ‘Goa Angh, Mridula Sinha-i sorkar akumtsü atema mejaok tashi Congress-i atatsüla’ ta ashi.
“Inyakyim nung aliba ama Angh dang sorkar akumtsü atema ni shidi ka zülur liasü, saka Singh-i kü dang, convention nung aliba ama Angh-i asenok jaoktsü ta ashi. Anungji onoki ibaji ataa liasü,” ta Faleiro-isa ashi.
Pai ashiba agi, March 11 aonung (election osang sangdongbanü) independent MLA, Pohan Khaunte aser NCP MLA, Churchill Alemao na den ano independent MLA anati Congress pusemtsü ta shir liasü.
“March 11 aonung onok MLA 21 liasü, saka onok ket nung parnok signatures maliasü. O lemteptsü aser telemtetba agitsü atema Venugopal aser Singh na nem tashi agüja liasü. Ni shinga nema tai metongloktsüner, ajisüaka onok iba aonungji telemtetba agi tajungba süla ta bilemer,” ta Faleiro-i ashi.
Osang ajanga angazükba agi, March 11 aonung Singh, Venugopal aser Chellakumar nungeri GFP nungi Vijai Sardessai ajurua pa dang Congress teloktep nung adentsü asüngdang.
“Ozü general secretary aser Delhi nung lenirtemi, onoki GFP denbo teloktep meyanglutsüla ta tuyu. Ni shinga nema tai metongloktsür, ajisüaka ni shinübaji- ni north-east state tem nung in charge inyakdangbo idangyongjisa ni telemtetba agi,” ta paisa ashi.