Yogi UP CM asutsü, Keshav aser Dinesh Dy. CM asutsü

Lucknow, March 18 (Agencies): Uttar Pradesh nung tang tasen shimba Bharatiya Janata Party (BJP) MLA temi Gorakhpur MP, Yogi Adiyanath legislature party lenir asutsü shimogo; pa UP chief minister asutsü aser Keshav Prasad Maurya o Dinesh Sharma na Deputy Chief minister asütsü shim.
Tawa Uttar Pradesh assembly election nung BJP-i assembly menden 402 nungi menden 312 anguba sülen hopta ka lir tesüsa iba telemtetba agiogo.
Legislature Party lenir asutsü atema BJP lenir, Suresh Khanna-i Adityanath tenüng benok aser Union Information & Broadcasting Minister, M Venkaiah Naidu-a ibaji agizük.
Tanü nikongdang Lucknow nung osangbenertem den jembidang UP BJP incharge, Om Mathur-i, “Uttar Pradesh nung Deputy Chief Minister ana- Keshav Prasad Maurya aser Dinesh Sharma asutsü, aser asüng sorkar tenangzükba agitsü,” ta metetdaktsü.
Ano BJP lenir, Sangeet Som-ia, “Party bangdak leniri UP CM menden atema Yogi Adityanath tenüng benok,” ta ashi.
BJP lenir, Suresh Khanna-i, “Iba senden nung UP CM menden atema ajaki Yogi Adityanath tenüng benok. Deputy Chief Minister tem atema Keshav Prasad Maurya aser Manoj Sinha na tenüng benok,” ta ashi.
Yogi Adityanath ya BJP nungi ponguben tashi MP inyaker ka lir. Pa ya UP anüdoklen Gorakhnath tekülem kidang tongti putir lir.
Ano külen deputy chief minister ana: Dinesh Sharma ya Lucknow Mayor lir aser Keshav Prasad Maurya ya UP nung party Tir lir.
Asüng nikongdang 2:15 ako meta Lucknow nung aliba Smriti Upvan complex nung sorkar tasen tenangzükba agitsü.