Singapore:Nisung tepsetba atema India nunger ka küm 10 tepuokdak ayutsü

Singapore, March 21 (Agencies) : Küm 16 tejakdang Singapore nung tetsür ka tepsetba ken o nung India nunger ka aija pa küm 10 tepuokdak ayutsü aser arr süng agi 12 ben azüktsü obendang agütsüogo.
2001 küm atalokba ken o ya küm 10 dak tema obendang magütsüi liasü.
Arishi küm 32 tain, Gunasegaran Ramasamy-i lift telung nung tetsür ka kotari agi tuita yur auyatsü merang. District court kati pa küm 10 tepuokdak ayutsü aser arr süng agi 12 ben azüktsü obendang agütsü. Iba obendang ya November 18, 2013 nung agütsüba lir, Hombarnü ta osangbenertemi ashi.
Ramasamy-i 2013 küm tetsür ka tenüng agi, Soh San tepsetba tai nangzük. Iba tasümang nung kotari agi atsüngba tarak agi sünga liasü. Pai nisung yirutsüba, auyaba aser methamphetamine mozü achiba tai-a nangzük.
District court-i iba ken o October 2, 2001 nü angadangdang, Ramasamy’er aianui pa dang Bukit Batok Street 21 nung aliba lar ki anasa dokan ka nungi noodles alir arutsü yok, ajisüaka pai auyatsü tasa asa, ta osang ajanga ashi.
Pai sorochiokdang amshiba kotari, centimeter 26 talang ka aben aser kiyong nung auyatsü bushia senzü, ta osangkaket nung shia lir.
Yamaji senzüba mapang nikongdang 8:00 nungi 9:00 ako tsüngda pai arishi küm 28 tain, Soh angu. Pai bena aliba kotari atsütet aser la dang sen meshi. Pai tetsürla indang sen juli rakzüktsü merang saka lai magütsütsü meranga atsüita ayu, anungji Ramasamy-i tejashi nung pai ama aliba kotari jagi la melao tashi aiben atsüng.
La laoba sülen Ramasamy iba tesem nungi jena ao. Iba sülen ki kapoka ia auyaba aser tangar dak azükba ken o dena ken o aika nung densemba ajanga küm 10 dak tema pa tepuokdaki iliadokli ta liasü.
November 17, 2013 nü pai tai inyakba agi anen marem nung police station kati oa pa tai nangzükba sülen pa pua ayu. Pa natsü nung Methamphetamine densema aliba dena putet.
Soh temang sensaa reprangba mapang la dak kotari agi tokuben tsünger aliba jangja. La dak toko aser tebok nung tsüngshiba ajanga asü, ta temang sensaa reprangertemi ashi.
Deputy Public Prosecutor Bhajanvir Singh-i, pai auyatsü asoshi sentong jelia yanglur ata aser kanga taochi makai nisungtem dak kongshi, ta ashi.
Ramasamy atema okatsür Ng Shi Yang-i, Ramasamy ji pai inyakba mapatem agi animesüngzükteti aküm aser nisung tepsetbaji auyatsü merangdang meimlai atalokba lir, ta ashi.
“Ramasamy-i aibelenba sasa bilem aser taitok meshiba ajanga pai Soh kinungertem temulung süngzüktsü imlar,” ta Ng-i ashi.