Pakistan aser Afghanistan arrtsü lapokogo

Islamabad March 21 (Agencies) : Mongulbarnü Pakistan-i shibanger aliba Afghanistan arrtsü tanaben lapoktsüogo. Linük ana tsüngda arrtsü ya Sindh nung aliba Sufi temeshi tesem maka nisung 70 tashi tepsetba sülen shibangba lir.
Torkham aser Chaman arrtsülen linük ana tsüngda oli aruli asüba gate ajanga khu abenba gari meyirjang aika linük ka nungi ka tashi ia liasü, ta Television osang ajanga metetdaktsü.
Ainlen jajar, khu benlenshir aser shishilembartemi sorkar telemtetba tajung atema pelaba lemsatep.
“Linük ana tsüngda tebilemtsütemji olemtep ajanga bentettsüla. Arrtsü shibanga ayuba ajanga item tebilemtsü akoktsü masü,” ta shishilembar kati ashi.
Hombarnü Ato Kilonser Nawaz Sharif-i Pakistan aser Afghanistan arrtsütem tanaben lapoktsü tetuyuba agütsüdang, iba tetuyuba ya tesendaktep tajungba akümtsü asoshi agütsüba lir, ta ashi.
Linük ana tsüngda arrtsütemji Mongulbar anepdang 7:00 ako nungi lapok, ta ketdangsertemi ashi.
Afghanistan nunger documents shitak bena alirtembo Pakistan-i aitdaktsütsü, ta ketdangsertemi Pakistan radio dang ashi.
Taoba ita Sindh province nung aliba temeshi tesem, Lal Shehbaz Qalandar nung tapoktsü pokloktsüba sülen nungi Pakistan-i Torkham arrtsü ya Afghanistan nunger maitdaktsütsü asoshi mapang tataktet makai shibanga liasü.
Security tebilemtsü adokba ajanga arrtsü shibanga ayu aser iba jagi shishilembaba aser sen dak sendakba maparen kata meinyaktetti liasü.