Xiaomi-i India nung Manufacturing Unit tanabuba amenloktsü

March 20, 2017 (Agencies): India nung Yaküm revenue nung sen billion 1 aazükba sülen, Hombarnü Chinese smartphone yanglur Xiaomi-i Taiwan nunger electronic yangluba company Foxconn den sentepa Andhra Pradesh nung manufacturing unit tanabuba amenoktsüba osang sangdongogo.
Andhra Pradesh, Sri City nung iba manufacturing plant tasenba amenokba sülenbo, India nung adoktsüba Xiaomi smartphone tem shilem 95bo linük nung yanglutsü.
Xiaomi factory nung mapa inyakba mapangbo joko second shia phone kaka yanglutettsü.
“Onok alima tesem 20 nung mapa inyakdar, saka ‘volume’ nung aser shishilembaba karakara ainbaren nung India ya onok asoshi shishilembatsü asoshi tajungtiba lir. Company ajaki iba telongjem nung tenük yoker aser onoki tang teinyakdak mapa den külemi phone ayokba sülen iba phone jangratema amshidaktsütsü asoshi service tajung agütsütsü,” ta Xiaomi India Vice President and Managing Director, Manu Jain-i osangbenertem dang ashi.
Company-i tawa sen jenjang 5,999 yong Redmi 4A smartphone sayaogo. Iba phone nung Qualcomm Snapdragon 425 processor aser 2GB RAM keta lir.
Xiaomi company India nung shishilemba daki 2014 küm July ita nung ait aser iba süli parnok indang mezüngbuba manufacturing plant amenoktsü asoshi sangdonga liasü. August 2015 nungi iba plant mapa inyak tenzük aser March 2016 tashi nungbo parnok indang phone shilem 75-bo India nung yanglua liasü.
Plant ajanga maneni iba meketa aliba yimtsüng 100 shi nung nisung 5,000 nem mapa agütsü. Mapa inyakertem rongnung shilem 90 dak nungi tema tetsür lir.
Tawa sayaba Redmi 4A pnone tasenba nung 5-inch-HD display, 13MP tesülen camera, Beautify mode den 5MP tejaklen camera aser 3,120mAh battery keta lir.
Iba phone talinürtemi March 23, 12 p.m. nungi tenzüka Mi.com aser Amazon nung angutsü.
“Iba plant tasenba aser Redmi 4A ajanga India nung aliba nüburtem taküm talitsü tajungba kümdaktsüba nung shilem agitsü kanga pela bilemer,” ta Jain-isa ashi.