Biren Singh tebilemtsü

Manipur nung Nongthonbam Biren Singh-i aniba government ya mezüng BJP teloki aniba government  akümer asütsü. Atangji, Congress dang nungibo BJP teloki tatar menden tajemba angu saka tangar telok nungi adoker tatartemi nungitba ajanga yakanü Hombar nü tatar senden nung nübo sayutepdang Biren Singh den teimba dena liasü. Biren Singh ya taoba chief minister Ibobi Singh den Congress nung küm ter dak tali külemi yimsüsüa arur yaküm küm tatemlen Congress telok toktsür BJP nung adenba nisung ka lir. Manipur nung Manipur (Metei) nunger li aser parnok temeten wazüka ayutsü asoshi taküm ajak bendanga agüja nokdaktsüba purtem rongnung Biren Singh ya dena lir. Iba tangatetba aliba agi pa yimten nung shilem agitsüsa aküm. Pa ya tamalen Manipur oshi nung adokba osangkaket ka nung yimozülur liasü. 2003 küm center nung BJP teloki aniba government alidang, ato kilonser Atal Bihari Vajpayee-i NSCN-IM den yimjung yangluba ya alima ajak nung yimjung asütsü atema yanglur ta metetdaktsüba agi Manipur nungertem jashia adok, kechiyong parnoki Manipur nungbo NSCN-IM den yimjung meyangluner. Iba osang jagi Manipur nungertem kanga jashidaktsü aser longkak aita government meyong kiojena dena rongdokja longkak ait. Iba mapang iba kenoji ajanga Biren Singh osangkaket nung inyaka aliba toktsür yimteni ait aser Congress nung Ibobi Singh leniba kübok tongtibang nisung ka aküm. Pa yaküm küm Congress telok nungi oadokba ajanga metetmeteta Congress tashimaitba kümogo. Atangji, chief miniter akümbaji maongka tuluka nguogo, saka Biren Singh asoshi, talisa, Naga nunger dak aketba tebilemtsü ken o tulu tepdaka lir. Pa chief minister kümli Manipur nung United Naga Council (UNC)-i taoba ita pezü tashi tangalen nungi jangotsü aser osettsüset kecha bener marudaktsüi nokdanga aliba lapokdaktsüogo aser Ibobi mapang UNC lenirtem puoka aliba chiokogo. UNC lenirtem ya Manipur leni jangotsü aser osettsüset kecha bener marudaktsüi nokdangba maparen nung aija puoka liasü aser UNC teloki nokdangba sentongji Ibobi-i aniba Manipur government-i Manipur küboksa süaka Naga nunger lushi nung district tasen tenet akümba anema nokdakba tamaitsü liasü. Manipur nung Naga nunger o Meithi nunger na meputeptetba tebilemtsü onükji ibaji lir. Atangji, BJP teloki aniba government tasenbai taoba Congress mapang puoka ayuba UNC lenirtem chiokogo aser UNC telokia jangotsü aser osettsüset kecha meyoki nokdanga aliba agienogo. Ajisüaka, government tasenba atema aji tebilemtsü akokba mapa ka masü aser UNC asoshia kecha takok osang ka masü, kechiyong taoba government mapang district tasen tenet akümba telemtetbabo shitak dang lir. Aji oda, Ibobi Singh-i akümba district tasen tenetji Naga nungertemi akangba ama Biren Singh-i maküm mesüdaktsütetra, pai aniba government nung NPF tatartem adentsübaji mesademi akümtsü. Ajak atema tebilemtsü kaji, Manipur nunger temeten asoshi nokdaktsübo  Ibobi Singh dangbo Biren Singh-ang tekong temerangba asütsüa akok, kechiyong Manipur lushi aser Manipur nunger temeten kümzüka ayutsü asoshi kanga sashia nokdakba ajanga pa tanü Chief minister menden tashi tongteta lir. Biren Singh atema tebilemtsüji aji tangbo masü saka ano yaküm Ibobi mapang nungsa Churachandpur len nübortemi government-i latetba ozüng kar anema nokdangdang khasetba nisung ti temang meremi lir. Item ama tebilemtsü den ano pa kübok kilonser terka shimtsüba khuret tuluka anendaka lir, kechiyong parnok den arua adener tatartem ajaki government nung menden tajung meshir. Aji oda, nisung kar danga kilonser menden agi matara tezü atsür Congress teloki aotsü ana nung lir. Ibayongji tang tashi Biren government nung kilonser meshimtetter. Item ajak dakji alaka Biren Singh atema tebilemtsü tulubaji Manipur nung Naga nunger temulungsüa inyaktsütsübaji asütsü. Ajisüaka, tang tangbo Biren Singh-i Naga nunger taginübabo mataloktsütettsü. Ibaji Biren Singh asoshi dang masü saka Naga nunger asoshi tebilemtsü tulu lir.