Schweinsteiger Manchester United MLS, Chicago Fire nungi asayatsü

Illinois, March 21 (Agencies): Taoba mapang Germany nunger captain Bastian Schweinsteiger ‘Major League Soccer’ nung ‘Chicago Fire’ nungi asayatsü asoshi kulizüngtepba osang ka ajanga metetdaktsü.
Germany puri 2014 World Cup akokba telok nung Schweinsteiger tongtibang züngsem ka liasü. Pa Manchester United nung manager Jose Mourinho kübok asayatsü asoshi aiben maongka mongoi lir United States nung oa asayatsü asoshi lemtetogo.
Küm 32 tain asayar ya visa ngutetba sülenbo United States-i aotsüba taruba hopta nungbo jangjatsü, ta kasa osang ajanga metetdaktsü.
“Pa ama asayar, shibai football asayaba jenjang ajak nung takok ngua ali pa onok rongnung anioktsü pela bilemer. Taoba mapang nungbo onok sasep nung asaya nung temolung süa liasü, saka tangbo joko onok asayaba jenjang ajungktea international jenjang nung bilemtsüla,” ta Fire nung general manager Nelson Rodriguez-i ashi.
Schweinsteiger 2015 küm Manchester United-i maru tsüngda pa German club Bayern Munich nung dang asayaa liasü.
Osang ka ajanga ashiba agi, Schweinsteiger million $4.5 yong ali, koba ajanga MLS nung jenjang tasaktiba agi asayar alir rongnung paa ka asütsü.
“Ni asayaba piyong temelenshi tajung ka bener arutsü asoshi maongka teti bushiaa dang aru. Ni Chicago Fire-i aotsüba ya tanga dang nung kecha balaka masü. Nelson aser Veljko na den sensaksemba ajanga club indang nükla aser tebilembatem angatetogo aser ni parnok iba sentong nung yarinür,” ta Schweinsteiger-i ashi.
MLS season tasenba tetenzük nung Chicago team puri mezüng asaya ana koka point 4 nuga liasü saka tasembuba asaya nung Atlanta pur gola 4 agi mekoki liasü. ‘Chicago Fire’ teloki 1998 küm MLS Cup akokba sülen tang tashi nung parnoki ken danga iba cup koka mali.